सर्लाही — मलंगवा नगरपालिकामा वडाध्यक्षसहित उपप्रमुखले नै ताला लगाएका छन् । नगरमा प्रमुख प्रशासकीय अधिकृत नहुँदा कामकाज गर्न असहज भएको भन्दै उपप्रमुख शकुन्तला देवीसहित वडाध्यक्षको टोलीले आइतबार तालाबन्दी गरेको हो ।

तत्कालीन प्रमुख प्रशासकीय अधिकृत होमनाथ सुवेदीको सरुवा भएपछि उनको स्थानमा आएका अमनकुमार कर्णलाई नगर प्रमुख नागेन्द्रकुमार रायले उपस्थित नगराउँदा कार्यालय प्रमुखविहीन बनेको छ । कार्यालय प्रमुख नहुँदा कार्यालयको खाता सञ्चालन हुन सकेको छैन । जसले भुक्तानीमा समस्या भएको छ । लामो समयसम्म खाता सञ्चालन नहुँदा विद्यालयका शिक्षकदेखि कर्मचारीसमेतले तलब पाउन सकेका छैनन् भने वृद्ववृद्धाहरूले सामाजिक सुरक्षा भत्ता पाउन सकेका छैनन् । तलवभत्ता नपाउँदा शिक्षकहरू पनि आन्दोलित हुँदै आएका छन् । 

यस्तै सदरमुकाम मलंगवामा रहेको श्रीमती कृष्णादेवी माध्यमिक विद्यालयको प्रधानाध्यापक नियुक्तिको विषयमा पनि नगर प्रमुखले अनावश्यक दबाब दिन थालेपछि समस्या उत्पन्न भएको छ । पालिकाबाट तलव नपाएपछि शिक्षकहरू कक्षाकोठामा उपस्थित नहुँदा विद्यार्थी पठन–पाठनबाट वञ्चित भइरहेका छन् । उनीहरूले नगर प्रमुखविरुद्घ नाराबाजीसमेत गर्दै आएका छन् ।

कक्षा १० का विद्यार्थी युवराजप्रसाद साहले विद्यालयमा पठन–पाठन नहुँदा आफूहरू आन्दोलनमा उत्रिनुपरेको जानकारी दिए । उनका अनुसार एसईई आउन केही महिना मात्र बाँकी रहँदा पठन–पाठनको अवरोधले विद्यार्थीहरू मर्कामा परेका छन् ।