जनकपुरधाम — मधेश प्रदेश सरकारले विपद् तथा जोखिमबाट नागरिकलाई जोगाउन गृहकार्य थालेको छ । मधेश सरकार सम्भावित विपद् तथा जोखिम न्यूनीकरण गर्न सक्रियता पनि बढाएको हो ।

बुधबार साँझ मुख्यमन्त्री जितेन्द्रप्रसाद सोनार (सोनल)ले आउने विपद्को सामना गर्न प्रदेश सरकार पूर्ण रुपमा तयार रहेको बताएका छन् । जल तथा मौसम पूर्वानुमान विभागले कात्तिक १३ देखि १५ सम्म मधेश प्रदेशको मौसम गडबढ हुने अनुमान गरेको छ । 

मधेश प्रदेशको सप्तकोसी, बागमती, कमला, रातु, लखनदेह र लालबकैया खतराभन्दा माथि पुग्न सक्ने विभागको अनुमान छ ।‘प्रदेश सरकार यो अवस्थालाई समाना गर्न पूर्ण तयार रहेको छ । मधेश प्रदेश प्रहरी, सशस्त्र प्रहरी र नेपाली सेनाका विपद् उद्धार टोलीलाई सम्भावित जोखिम क्षेत्रमा तयारी अवस्थामा राखिएको छ,’मुख्यमन्त्री सोनलले भने,‘आवश्यक पर्ने डुंगा, लाइफ ज्याकेट र अन्य उद्धार सामग्रीको भण्डारण सुनिश्चित गरिएको छ ।’ सम्बन्धित स्थानीय तहसँग निरन्तर सम्पर्क गरी सहकार्यको वातावरण पनि बनाइरहेका मुख्यमन्त्रीको भनाइ छ ।