राजविराज — सप्तरी प्रहरीले डर-त्रास देखाएर १४ लाखभन्दा बढी ठगी गर्ने समूहका एक जनालाई पक्राउ गरेको छ । पक्राउ पर्नेमा मोरङको विराटनगर महानगरपालिका–१६ का २७ वर्षीय अभिषेककुमार यादव रहेका छन् । उनलाई गत शनिबार राति घरनजिकैबाट पक्राउ गरेको हो ।

यादवसहितको समूहले २०८० फागुन ६ मा ह्वाट्सएपमा फोन गरी डर-त्रास देखाउॅंदै छोरालाई कब्जामा लिएको भन्दै मन्जुदेवी शाक्यसॅंग रकम माग गरेको थियो । मन्जुदेवीले विभिन्न व्यक्तिको बैंक खातामा १२ लाख ५० हजार रुपैयाँ जम्मा गरेपछि आफू ठगीमा परेको थाहा पाएको उनको जाहेरीमा उल्लेख छ । उनीहरुले पुनः फागुन ८ मा ह्वाट्सएपमै फोन गरी अर्की राजकुमारी देवीसॅंग पनि ६० हजार रुपैयाँ ठगी गरेका थिए । 

मलेसियामा रहेका छोरा बलात्कार मुद्दामा फसेको र उनलाई बचाउनका लागि ५ लाख रुपैयाँ बैंकमा पठाउन लगाइएको राजकुमारीको जाहेरीमा उल्लेख छ । उनीहरुले एक जनालाई कुटपिट गर्दै गरेको भिडियो पनि पठाएकाले डरले तत्कालै पैसा जोहो गरेर ५० हजार रुपैयाँ पठाए पनि थप पैसा पठाउनका लागि यादवसहितको समूहले राजकुमारीलाई पटक-पटक फोन गरी धम्की दिॅंदै आएको थियो । तर, त्यही बेला छोरासॅंग फोनमा कुरा हुँदा केही नभएको कुरा जानकारीमा आएको ठगीमा परेकी राजकुमारीले प्रहरीमा जाहेरी दिएकी थिइन् ।