डीएसपी बमका अनुसार ७ किलो चाँदी बरामद गरी सुनचाँदी व्यवसायी संघका नेतृत्वलाई समेत बोलाएर मुचुल्का गर्न खोजेपछि जनकपुर उद्योग वाणिज्य संघका अध्यक्ष सुरेन्द्र भण्डारी आएर विवाद गरेपछि झडपको अवस्था आएको थियो । ‘उद्योग वाणिज्य संघको अध्यक्ष आएपछि लैजान नदिने अडान कसे,’ डीएसपीले बलमे भने, ‘उनीसहित व्यवसायीहरु प्रहरीमाथि आक्रमण गरेपछि झडप हुन पुगेको थियो ।’

बिल माग्दा नदेखाएको र अनुसन्धानका लागि लग्न खोज्दा विवाद गरेको उनको भनाइ छ । यता उद्योग वाणिज्य संघ जनकपुरका महासचिव फूलदेव पण्डितले धनतेरश तथा तिहारको पूर्वसन्ध्यामा प्रहरीले हक्काहाकी रकम मागेको र नदिँदा सुन चाँदी उठाएर लग्न खोज्दा विवाद भएको आरोप लगाए ।

उनका अनुसार पहिला ‘कारिगर’ काम गर्ने सञ्जय ठाकुरले भर्खरै नयाँ सुनचाँदी पसल खोलेका छन् । त्यहाँ ठाकुरले अरुको गहना पनि बनाउने गर्छन् । पसलमा सुरुमा एकजना प्रहरी सादा पोसाकमा पाउजु बनाउने बहानाले आएको र त्यहाँ रहेको सबै चाँदी दिन भनेपछि विवाद बढेको हो । चाँदी प्रहरीले लग्न खोजेपछि अवस्था बिग्रिएको महासचिव पण्डितको भनाइ छ । 'व्यवसायीहरु पुगेर धनतेरशको पूर्वसन्ध्यामा यसो किन गर्नुभयो भनेपछि प्रहरीले लाठीचार्ज गर्न थाले,' उनले भने । प्रहरीले त्यसपछि हवाइफायर र अश्रुग्यास पनि प्रहार गरेको उनले बताए ।