जनकपुरधाम — धनुषा प्रहरीले कुनै पनि निकायसँग समन्वय नगरी सुनचाँदी पसलमा छापा मारेको खुलेको छ । राजस्व अनुसन्धान विभाग र राजस्व चुहावट समितिको अध्यक्ष प्रमुख जिल्ला अधिकारीसँग समन्वय नगरी प्रहरीले शुक्रबार छापा मारेको पाइएको हो ।

धनुषाका डीएसपी गणेशबहादुर बमले राजस्व अनुसन्धान कार्यालय पथलैयासँग समन्वय र अनुमति लिएर छापामारी गरेको दाबी गर्दै आएका छन् । तर, राजस्व अनुसन्धान कार्यालय पथलैया प्रमुख हरि शर्माले बिनासमन्वय धनुषा प्रहरीले छापामारी गरेको कान्तिपुरकर्मीलाई प्रतिक्रिया दिए । सूचनाका विषयमा छलफल भए पनि आफूहरुको सहमतिबिना छापामारी भएको उनले बताए । ‘हिजो धनुषाका डीएसपी राजस्व छलीको सुनचाँदीको विषयमा सूचना दिनुभयो । शुक्रबार ४ बजेतिर हाम्रो कुराकानी पनि भयो । तर, मैले सूचनाको जाँच गरेर अपडेट गराउन भनेका थिए,’ उनले भने, ‘त्यसपछि हामीलाई कुनै जानकारी छैन । छापामारीको विषयमा हामीसँग समन्वय भएको छैन । हाम्रो प्रतिनिधि पनि कोही गएका छैनन् ।’ 

जिल्लास्तरमा राजस्व चुहावट समितिको अध्यक्ष प्रमुख जिल्ला अधिकारी हुने भएको हुनाले त्यहाँबाट पनि समन्वय गरेर छापामारी गर्न सक्ने उनले बताए । तर, धनुषाका प्रमुख जिल्ला अधिकारी शंकरहरि आचार्यले छापामारीको विषयमा अनविज्ञ रहेको बताए । अधिकारीक जानकारी नआएर छापामारी गरेको उनको भनाइ छ । ‘मलाई जानकारी नगराई छापामारी गरेको छ,’ प्रमुख जिल्ला अधिकारी आर्चायले भने, ‘छापा मारेको विषय अन्य निकायबाट थाह भयो । तर, प्रहरीले समन्वय नगरी छापा मारको छ ।’

सुनचाँदी व्यवसायी महासंघको मधेश प्रदेश महासचिव मनिष रमनले प्रहरीले छापा मार्न भन्दै लुट्न आएको आरोप लगाए । ‘डीएसपीको नेतृत्वमा केही घुमुवाले सात किल्लो चाँदी व्यवसायीको लुटेर लगेका छन्,’ उनले भने, ‘न उनीहरुसँग सर्च वारेन्ट छ, न राजस्व अनुसन्धान विभागको प्रतिनिधि छ । अनी कसरी छापामारी भयो ?’ अन्तिममा उद्योग वाणिज्य संघ र सुनचाँदी व्यवसायीले मुचुल्का गरेर लग्नभन्दा पनि बिना मुचुल्का/कागजात गरी लग्ने प्रहरी नभई लुटेरा भएको उनको भनाए छ ।