नदीले बगाएर ल्याएको दाउरा टिप्ने क्रममा माधवनायाण नगरपालिका–८ की ७५ वर्षीया पन्मादेवी रायको डुबेर मृत्यु भएको प्रहरीले जनाएको छ।
रौतहट — बागमती नदीमा आएको बाढीमा दाउरा टिप्न गएकी माधवनारायण नगरपालिकाकी एक वृद्धाको आइतबार डुबेर मृत्यु भएको छ ।
माधवनायाण नगरपालिका–८ का हरिवंश रायको श्रीमती ७५ वर्षीया पन्मादेवी रायको नदीले बगाएर ल्याएको दाउरा टिप्ने क्रममा डुबेर मृत्यु भएको जिल्ला प्रहरी कार्यालय गौरले जनाएको छ ।
पन्मादेवी घरदेखि झन्डै २ किलोमिटर उत्तर पूर्वमा पर्ने बागमती खोलामा दाउरा टिप्न गएकी थिइन्। घटनापछि स्थानीय र प्रहरीको सहयोगमा शवलाई खोलाको किनारमा निकालिएको छ।
घटनाबारे थप अनुसन्धान भइरहेको प्रहरीले जनायो । लगातार वर्षाका कारण बागमती नदीमा बाढी आएको छ । स्थानीय प्रशासनले नदीको किनार नजान अनुरोध गरेको छ ।
