कारागार प्रमुख अशोक क्षेत्रीका अनुसार, प्रशासनले परिवारलाई फोन गरी कैदीबन्दीलाई कारागार फर्काउन प्रयास गरिरहेको छ। हालसम्म २१० कैदीबन्दी फर्किएका छन्।
महोत्तरी — जेन-जी समूहको आन्दोलनको मौका छोपी महोत्तरीको जलेश्वर कारागारबाट फरार २ सय १० कैदीबन्दी कारागार फर्किएका छन् । आन्दोलनको समयमा कारागारबाट ५ सय ७५ कैदीबन्दी फरार भएका थिए ।
जलेश्वर कारागार प्रशासन र कारागारका नाइकेहरूले हरेक फरार कैदीबन्दीका परिवार र आफन्तलाई फोन गरेर सम्झाउँदै तिनीहरूलाई कारागार फर्काउने काममा लागेका कारागार प्रमुख अशोक क्षेत्रीले बताए ।
क्षेत्रीका अनुसार अहिले दैनिक ४/५ जना कैदीबन्दी कारागार फर्किरहेका छन् ।
महोत्तरीको बोर्डर क्षेत्रबाट भारतीय प्रहरीको सहायतामा पक्राउ परेका १२, धनुषा प्रहरीले पक्राउ गरेका ५ र स्वेच्छाले फर्किएका अन्य कैदीबन्दी गरी २ सय १० जना कारागार फर्किएका कारागार प्रशासनले जनाएको छ ।
जम्मा ५ सय ७६ कैदीबन्दी रहेका जलेश्वर कारागारबाट १ कैदी भाग्न मानेका थिएनन् ।
अन्य बाँकी फरार कैदीबन्दी पनि कारागार फर्काउन कारागार प्रशासनले पहल गरिरहेको प्रमुख क्षेत्रीले जानकारी दिए ।
