सरकारले प्रतिपक्षको अनुपस्थितिमा बजेट पारित गर्दा प्रतिपक्षले सदनमा विरोध गर्दै आफ्नो आवाज बुलन्द गरेका छन्।
जनकपुरधाम — मधेश प्रदेशसभाको बैठक अर्को सूचना नभएसम्मका लागि स्थगित भएको छ । शुक्रबार छैटौँ अधिवेशनको दोस्रो बैठक पनि प्रतिपक्षी दलले मधेश प्रदेशसभामा विरोध गरेपछि बैठक स्थगित भएको हो ।
आजको बैठक सुरु हुनेवित्तिकै प्रतिपक्षी दलले उठेर ढ्यापढ्याप गर्दै विरोध जनाएका थिए । नेकपा (माओवादी केन्द्र) का सांसद जवाहरलाल कुशवाहाले बजेट असमान तथा बिचौलिया हावी भएको आरोप लगाए । बजेटमा अपारदर्शिता र व्यापक अनियमितता देखिएको उनको भनाइ छ ।
‘बजेट ल्याउने प्रक्रियामा वित्तीय अनुशासन उल्लङ्घन भएको देखिन्छ,’ उनले भने, ‘त्यस कारण हामीले अर्थमन्त्रीको राजीनामा माग गरेका छौँ । राजीनामा नआएसम्म हामी सदन अवरुद्ध गरिरहन्छौँ ।’
सत्तापक्ष नेपाली कांग्रेसका सांसद कुमरकान्त झाले सरकार र अर्थमन्त्रीको बचाउ गरे । प्रतिपक्षले टेबलबाट समाधान गर्नै नखोजेको उनले आरोप लगाए । सर्वदलीय बैठकमा छलफल गर्न उनले अनुरोध गरे ।
‘झगडा अन्त्य हुन्छ, तर रगडा कहिल्यै अन्त्य हुँदैन,’ उनले भने, ‘प्रतिपक्षले अहिले रगडा गरिरहेको छ । सकारात्मक सोच लिएर नआए समाधान हुन सक्दैन ।’
सरकारले प्रतिपक्षको अनुपस्थितिमा बजेट पारित गरेको थियो । सरकारले प्रदेशसभामा चार सय ६१ पृष्ठको मात्र रेडबुक प्रस्तुत गरेको थियो । तर पछि कार्यदलले सात सय ५५ पृष्ठको रेडबुक भएको भेटिएको थियो । त्यही कारण प्रतिपक्ष दलले चार सय ६१ पृष्ठलाई मात्र मान्यता दिन र बाँकी पृष्ठको योजनालाई खारेज गर्न माग गर्दै आएको थियो ।
