राजविराज — सप्तरीको राजविराज नगरपालिका–७ मुख्य बजारस्थित साकेतचन्द्र मिश्र पार्क वर्षौंदेखि बन्द छ । तर, राजविराज नगरपालिका र डिभिजन वन कार्यालयले आलोपालो गरी बर्सेनि बजेट भने खर्च गरिरहेका छन् ।दुवै कार्यालयले तीन वर्षयता ४४ लाख ३७ हजार रुपैयाँ बजेट खर्च गर्दा पनि सो अनुपातमा काम भने देखिँदैन । 

डिभिजिन वन कार्यालयले आर्थिक वर्ष ०७९/०८० मा पार्क मर्मतसम्भार गर्न १४ लाख ४३ हजार, गत वर्ष पार्क पुनर्निर्माण तथा सौन्दर्यकरणका लागि १४ लाख ९४ हजार र नगरपालिकाले अघिल्लो वर्ष १५ लाख रुपैयाँ खर्च गरेको छ । तर, वर्षौंदेखि बन्द पार्क अझै सञ्चालनमा आएको छैन । बर्सेनि बजेट खर्चिंदासमेत पार्कको अवस्था जीर्ण छ ।

मूलगेटको माथिल्लो भागमा नै चिरा परेको छ भने बायाँतिरको भागमा चर्किएर झर्न थालेको छ । घेराबेरा गरिएका पर्खाल पनि ठाउँ–ठाउँमा चर्किएर जीर्ण अवस्थामा छन् । डिभिजन वन कार्यालयले त्यही पर्खाल मर्मतका नाममा रंगरोगन गर्दै १४ लाख ४३ हजार रुपैयाँ सिध्याएको छ भने पछिल्लो बजेटबाट लाइटसहितका कार्य गरेको कार्यालयको दाबी छ । तर, उपभोक्ता समितिसँग मिलेमतो गरी बजेट सिध्याउने कार्य मात्र भएको स्थानीयको आरोप छ । 

डिभिजन वन कार्यालयका प्रमुख सुभाषचन्द्र दासले माथिबाटै तोकेर बजेट पठाउँदा काम गर्न बाध्य भएको बताए । ‘पहिले पनि बजेट हालेको विषय मलाई जानकारी थिएन तर पछिल्लो पटक मन्त्रालयबाट तोकेरै बजेट आउँदा लाइटसहित अन्य काम गराएको छु,’ उनले भने ।