सर्लाही — भ्रष्टाचारी ठहर भएका कांग्रेस सर्लाहीका सभापति सुरेन्द्रप्रसाद सिंहले पदबाट राजीनामा दिएका छन् ।

जिल्ला सभापति सिंहले पार्टी केन्द्रीय सभपाति शेरबहादुर देउवालाई राजीनामा पत्र बुझाएका हुन् । आफूमाथि दायर भएको मुद्दामा अदालतले दिएको आदेशलाई स्वीकार गर्दै राजीनामा दिएको सिंहले उल्लेख गरेका छन् । उनले आफूमाथि अन्याय भएको र यसका लागि कानुनी लडाइँ जारी राख्ने पनि जनाएका छन् ।

सिंहलाई विशेष अदालतले तत्कालीन मनुस्मारा सिंचाइ आयोजनाको जल उपभोक्ता समिति अध्यक्ष रहँदा भ्रष्टाचार मुद्दामा केही समयअघि दोषी ठहर गरेको थियो । विशेषको फैसला सदर गर्दै सर्वोच्च अदालतले समेत उनलाई चार महिना १५ दिन कैद र एक करोड २३ लाख रकम बिगो भराउने फैसला गरेको थियो ।