झडपमा देवाही गोनाहीका नगर प्रमुख प्रेमलाल साह गम्भीर घाइते भएका छन् । उनको टाउकोमा चोट लागेको ईलाका प्रहरी कार्यालय गरुडाले जनाएको छ ।
रौतहट — रौतहटको धरहरी गाउँमा शनिबार कृष्ण जन्माष्टमी मेला उद्घाटनको विषयलाई लिएर दुई पक्षबीच झडप हुँदा नगरप्रमुखसहित पाँच जना घाइते भएका छन् ।
देवाही गोनाही नगरपालिका–९, धरहरीमा कृष्ण जन्मअष्टमी मेलाको उद्घाटन (रिबन काट्ने) कार्यक्रमलाई लिएर विवाद उत्पन्न हुँदा झडप भएको हो । झडपमा देवाही गोनाहीका नगर प्रमुख प्रेमलाल साह गम्भीर घाइते भएका छन् । उनको टाउकोमा चोट लागेको ईलाका प्रहरी कार्यालय गरुडाले जनाएको छ ।
झडपको घटनामा प्रहरी जवान जगदीश यादव र घनशंकर ठाकुरलगायत ५ जना घाइते भएका छन् । नगर प्रमुख साहलाई तत्कालै उपचारका लागि गरुडास्थित बेटर नेपाल मल्टिस्पेसियालिटी अस्पताल भर्ना गरिएको छ । उनको टाउकोमा १५ वटा टाका लागेको छ ।
इलाका प्रहरी गरुडाका डीएसपी राजन कार्कीका अनुसार धरहरीस्थित कृष्ण मन्दिरमा लाग्ने मेला उद्घाटन गर्न नगरप्रमुख साहले जोड दिएपछि विवाद सुरु भएको हो ।
धार्मिक कार्यक्रम भएकाले राजनीतिक कार्यक्रम जस्तै नगर्न नगरप्रमुख साहलाई स्थानीयले सुझाव दिएका थिए । उनले उद्घाटन गर्नुपर्छ भने पछि दुवै पक्षबीच झडप भएको हो ।
झडपमा संलग्न रहेको आरोपमा प्रहरीले धरहरी टोलका राधामोहन साह, विनोद साह र रीतिक साहलाई पक्राउ गरेको जनाएको छ । पक्राउ परेकाहरुबारे अनुसन्धान भइरहेको प्रहरीले जनाएको छ ।
