जनकपुर — ९ वटा तमसुक, २३ वटा लालपुर्जा र पाँच वटा चेकसहित पक्राउ परेका जनकपुरधाम उपमहानगरपालिका-९ का राजकिशोर यादवलाई धनुषा जिल्ला अदालतले धरौटीमा थुनामुक्त गर्न आदेश दिएको छ । बिहीबार न्यायाधीश मनोजकुमार श्रीवास्तवको इजलासले ५० हजार धरौटी लिएर थुनामुक्त गर्ने आदेश दिएको हो ।

मिथिला नगरपालिका–८ की विमलाकुमारी ध्रोङचिङ मगर (ऋणी) ले साहु राजकिशोरको नाममा ‘सुसाइड नोट’ लेखेर आत्महत्या गरेकी थिइन् । त्यसपछि प्रहरीले यही साउन २ गते यादवलाई पक्राउ गरेको थियो ।

मृतक परिवारकै जाहेरीको आधारमा जिल्ला सरकारी वकिलको कार्यालयले उनीमाथि आत्महत्या दुरुत्साहन र अनुचित लेनदेन मुद्दा दायर गरेको थियो। यादवलाई आत्महत्या दुरुत्साहनमा बुधबार चार लाख धरौटीमा छोड्ने आदेश दिएको थियो भने आज अनुचित लेनदेन मुद्दामा पनि धरौटी लिएर थुनामुक्त गर्न आदेश दिएको हो ।