सिरहा — सिरहाको धनगढीमाई नगरपालिका-११ आमचोकका ८५ वर्षीय फनिलाल यादवको हत्या घटनामा दुई जना पक्राउ परेका छन् । प्रहरीले दुई साताको अनुसन्धानपछि घटनामा दुई जनालाई पक्राउ गरेको हो ।

धनगढीमाई नगरपालिका-२ भवानीपुरका ३३ वर्षीय महेश चौधरी र सोही ठाउँका १९ वर्षीय प्रशान्त कुमार मण्डललाई पक्राउ गरिएको प्रहरीले जनाएको छ । उनीहरूलाई बिहीबार पत्रकार सम्मेलनमार्फत् प्रहरीले सार्वजनिक गरेको छ । यस्तै, उनीहरूमाथि थप अनुसन्धानका लागि सिरहा जिल्ला अदालतबाट प्रहरीले पहिलोपटक सात दिनको म्याद पनि पाएको छ ।

गत साउन १४ गतेको मध्यरातमा फनिलालको आफ्नै घरमा धारिलो हतियार प्रहार गरी हत्या भएको थियो । प्रहरीका अनुसार, अनुसन्धानका क्रममा चौधरीले आफूहरू त्यहाँ चोरी गर्न गएको र फनिलालले होहल्ला गर्न खोज्दा आफूले बोकेको खुकुरी शरीरको विभिन्न भागमा प्रहार गरेको बयान दिएका छन् ।

उनीहरू फनिलालमाथि धारिलो हतियार प्रहार गरी फरार भएको र अत्याधिक रक्तस्रावका कारणले उनको मृत्यु भएको प्रहरीको अनुसन्धानबाट खुलेको छ । जिल्ला प्रहरी कार्यालय, सिरहाका प्रमुख प्रहरी उपरीक्षक अनन्तराम शर्माका अनुसार केन्द्रिय अनुसन्धान ब्यूरो (सीआईबी), प्रदेश प्रहरी कार्यलय, जिल्ला प्रहरी कार्यालय र ईलाका प्रहरी कार्यालय लहानले संयुक्त रूपमा घटनाको अनुसन्धान गरेको थियो ।