जनकपुरधामलाई रामायण सर्किटमा विशेष स्थान दिनुपर्ने, मधेशका स्थलको अन्तर्राष्ट्रियकरणको लागि सहयोगको आवश्यकता रहेको छ।
जनकपुरधाम — मधेश प्रदेश सरकारले ‘घुमौं मधेश, बुझौं मधेश’ नीतिलाई सार्थकता तुल्याउन भारतका रक्षामन्त्री राजनाथ सिंहलाई दश बुँदे मागसहित ज्ञापनपत्र बुझाएको छ । बिहीबार ‘घुमौं मधेश, बुझौं मधेश’का संयोजक विकासकुमार ठाकुरले भारतको दिल्ली पुगेर मन्त्री सिंहलाई ज्ञापनपत्र बुझाएका हुन् ।
जनकपुर–अयोध्या धार्मिक पर्यटकको कोरिडोर बनाउनुपर्ने, भारतदेखि मधेश प्रदेशका धार्मिक स्थल पुग्न बस/रेल सेवा सुरु गर्न र अयोध्याबाट जनकपुरधाम सीधा हवाई सेवा प्रारम्भ गर्नुपर्नेलगायत मागसहित मन्त्री सिंहलाई ज्ञापनपत्र बुझाइएको छ ।
पर्यटन प्रवर्द्धनका लागि नेपाल र भारत सरकारले समन्वय गरेर जनकपुरधामलाई रामायण सर्किटमा विशेष स्थान दिनुपर्ने, ‘सीता बिना राम अधुरो’ रहेको उल्लेख गर्दै भारतमा पनि जनकपुरधामको प्रचार गर्नुपर्ने, अयोध्या/वाराणसीमा डिजिटल बोर्ड राखेर मधेशका धार्मिक स्थलको प्रचार गर्नुपर्ने र मधेशका प्रमुख पर्यटकीय स्थलको अन्तर्राष्ट्रियकरण गर्न सहयोग गर्नुपर्ने ज्ञापनपत्रमा उल्लेख गरिएको छ ।
भारतको पर्यटन नीतिमा मधेशका प्रमुख धार्मिक स्थललाई सीमा पर्यटन भनेर राख्न पनि ज्ञापनपत्रमार्फत माग गरिएको छ । मधेश र भारतका धार्मिक स्थलको प्रचार–प्रसारका लागि संयुक्त रूपमा अभियान चलाउनुपर्ने उद्देश्यले भारत सरकारको ध्यानाकर्षण गराउने ज्ञापनपत्र बुझाएको संयोजक ठाकुरले बताए ।
ज्ञापनपत्रमा मधेश प्रदेशका प्रमुख धार्मिक स्थलहरूको नाम समेत उल्लेख गरिएको छ । यसले दुवै देशको पर्यटन प्रवर्द्धनमा सहयोग पुग्ने विश्वास समेत गरिएको छ ।
