साउन १७ गते चन्द्रपुर–१ नुनथरस्थित बागमती नदीमा बेपत्ता भएका भारतीय नागरिकको शव दुई दिन पछि आइतबार राति नहरमा फेला परेको हो ।
काठमाडौँ — रौतहटको गुजरा नगरपालिका–७ पल्टुवास्थित पूर्व–पश्चिम बाग्मती नहरमा सशस्त्र प्रहरीले भारतीय नागरिकको शव फेला पारेको छ ।
साउन १७ गते चन्द्रपुर–१ नुनथरस्थित बागमती नदीमा बेपत्ता भएका भारतीय नागरिकको शव दुई दिन पछि आइतबार राति नहरमा फेला परेको हो ।
भारतको बिहार राज्य जिल्ला खगडिया ग्राम पछौरा–२ का ३० वर्षीय रोहितकुमार सिंहको शव फेला परेको सशस्त्र प्रहरी बल रौतहटका एसपी सन्तोषकुमार बस्नेतले जानकारी दिए । नुनथरस्थित झोलुङ्गे पुलको तल मादक पदार्थ सेवन गरी बागमती नदीमा नुहाउन जाने क्रममा अचानक नदीले बगाई सिंह बेपत्ता भएका थिए ।
मृतकको शव भाइ शत्रुहन कुमारले बुझेर लगेको प्रहरीले जनायो । साउन १० गते नुनथरस्थित बागमती नदीको डिलबाट हाम फाल्न खोज्ने भारतको जिल्ला सीतामढी भुटीका ४५ वर्षीय रामविर महतोको जीवितै उद्धार गरेको सशस्त्र प्रहरीका एसपी बस्नेतले बताए ।
शनिबार साँझ वृन्दावन नगरपालिका–१ रामनगरस्थित पूर्व–पश्चिम बागमती नहरमा चन्द्रपुर–९ चेतनगर विर्ताका सरोज साहकी श्रीमती २५ वर्षीया रुमा देवीको शव फेला परेको प्रहरीले जनायो । नहरमा डुबेको अवस्थामा शव फेला परेको थियो ।
