राजविराज — सप्तरीको राजविराज नगरपालिका–११ मा बुधबार साँझ बलात्कृत भएकी १५ वर्षीया बालिकाको परिवार आरोपित पक्षको धम्कीका कारण जाहेरी दिनै हच्किएको छ । सामूहिक बलात्कार घटना खुलेपछि मिलापत्रका लागि बसाइएको ‘पञ्चायती’ मा पीडित परिवारले जाहेरी दिने अडान नछाडेपछि प्रलोभन देखाउन र धम्क्याउन थालिएको थियो । त्यसपछि पीडित परिवार घटनाबारे बोल्नै तर्किने गरेको छ । 

दलित समुदायकी ती बालिकालाई बुधबार राति ८ बजे घरअगाडि उभिइरहेका बेला चार जनाले उठाएर लगी सामूहिक बलात्कार गरेको परिवारजनको भनाइ थियो । बालिकालाई जबर्जस्ती लगिरहेको छिमेकीले देखेपछि तत्कालै खोजी गरिए पनि भोलिपल्ट मात्र गाउँनजिकै एक घरमा लुकाएर राखिएको अवस्थामा भेटिएको थियो । आरोपितमध्येका १९ वर्षीय किशोरलाई देख्नासाथ परिवारजनले समातेर हातपात गरेका थिए । त्यसपछि उनलाई प्रहरीको जिम्मा लगाइएको थियो । दुई दिनसम्म जाहेरी नपरेको भन्दै प्रहरीले आरोपित किशोरलाई परिवारको जिम्मामा छाडेको छ । 

जिल्ला प्रहरी कार्यालयले बिहीबार पीडित बालिकालाई समेत बोलाई महिला, बालबालिका तथा ज्येष्ठ नागरिक सेवा कक्षमा प्रारम्भिक बयान लिएर घर फर्काएको थियो । १८ र १९ वर्षका किशोरले बलात्कार गरेको र अरू दुई जनाले सघाएको पीडित बालिकाको भनाइ थियो । 

बालिका घर फर्किएदेखि नै जाहेरी नदिन पीडक पक्षले दबाब दिँदै आएको थियो । मिलापत्रका लागि वडाध्यक्ष उदितनारायण यादव समेतको उपस्थितिमा शुक्रबार बिहान साढे ८ बजे स्थानीय स्वास्थ्य चौकीमा ‘पञ्चायती’ बोलाइएको थियो । पीडित परिवार पनि पञ्चायतीमा उपस्थित भएको थियो । 

वडाध्यक्ष यादवले भने पञ्चायतीमा गल्ती गर्नेलाई कानुनअनुसार कारबाही हुनुपर्ने विषय मात्रै आफूले बोलेको दाबी गरे । ‘म पञ्चायतीमा गएको होइन, मल वितरण गर्न बिहानै वडा कार्यालय पुग्दा छलफल भइरहेको देखेको हो,’ उनले भने, ‘मैले घटना मिलाउन दबाब दिएको छैन ।’