जनकपुरधाम — बिहीबारसम्म धनुषा हंसपुर नगरपालिका–९ का एकाई मण्डल निकै चिन्तित थिए । पानी अभावमा खेत रोपाइँ गर्न नसक्दा उनी चिन्तित थिए । तर, शुक्रबार र शनिबार पानी परेपछि उनी अहिले हर्षित छन् । दुई दिनमै उनले एक विघा जमिन रोपाइँ गरेको मुस्कुराउँदै सुनाए ।

‘वर्षाको पानीले राहत भएको छ । कुनै उपाय नभएको खेत पनि रोप्न पाएको छु,’ उनले भने, ‘बिउ तयार थियो । पानी मात्रै नभएर मात्रै चिन्तामा थिए । इन्द्रदेवले पूरा गरिदिए ।’

उनी जस्तै खुशी छन् त्यही ठाउँका छोटी मण्डल । उनले पनि डेढ विघा खेत दुई दिनमा रोपाइँ गरेको बताए । पानीकै पर्खाइमा रहेका उनले साउन दोस्रो सातासम्म रोपाइँ गर्न सकेका थिएनन् । पानी परेपछि एकै दिन २५ जना मजदुर खटाई धमाधम रोपाइँ गरेको उनले बताए ।  

‘अहिले वर्षा भयो त धान रोप्न पायो किसानले । अर्को वर्ष परेन भने कसरी रोप्ने ?,’ उनले प्रश्न गर्दै भने, ‘सरकारलाई सोच्नु पर्दैन । कि खाली कुत (कर) र भोट लिने बेला मात्रै किसानको याद आउँछ ।’ सरकारले सिँचाइको उचित व्यवस्था र ठोस योजना नल्याउँदा समस्या देखिएको उनले बताए । आगामी दिनमा किसान मल, खाद्यको लागि पनि समस्यामा पर्ने उनले अनुभव सुनाए । ‘अहिले पानी अभाव थियो त अकाशबाट वर्षा भयो । भोलि मल खाद्य अभाव हुन्छ,’ उनले भने, ‘त्यो त आकाशबाट वर्षा हुने कुरा होइन । त्यसको लागि किन सरकारले सोच्दैन ।’

त्यही ठाउँका जयप्रकाश मण्डलका भने हंसपुर वरिपरि ५ सय विघा जमिन छ । जसमध्ये बिहीबारसम्म एक सय विघा मात्रै जमिनमा रोपाइँ भएको थियो । तर, यो तीन दिनमा दुई सय विघाभन्दा बढी जमिन रोपाइँ भएको उनको अनुमान छ । धनुषा सहीदनगर नगरपालिका–५ का गोविन्दप्रसाद मण्डलले पनि दुई दिनभित्र दुई विघा जमिन रोपाइँ गरेको बताए । उनले पनि पानी नहुँदा रोप्न पाएका थिएनन् । ‘किसानलाई त वर्षाकै पानीको आश छ, वर्षा भए रोपाइँ हुन्छ नभए अकाश हेरेर बस्छ,’ उनले भने, ‘पानी नपरेको भए अधिकांश खेत रोपाइँ हुँदैनथ्यो ।’