महोत्तरी — जलेश्वरको भागेश्वर पोखरी डिलको डिप बोरिङबाट केही वर्षअघिसम्म आसपासमा धान खेती हुन्थ्यो। बोरिङ त अहिले पनि छ, तर अवशेष मात्रै । बोरिङ फोहरले पुरिएको छ। पम्पका पुर्जा चोरी भएका छन्। प्राविधिक बस्ने कोठा जुवा खेल्ने र लागुऔषध सेवनकर्ताको अड्डा बनेको छ।

बोरिङ बन्द भएपछि जलेश्वर सारिका मोहम्मद सफिद राईनले १० कठ्ठा जग्गामा यस वर्ष धान रोप्न पाएनन्। राईन मात्रै नभई आसपासका ५० बिगाहाभन्दा बढी खेत बाझै छ।

भूमिगत जलस्रोत तथा सिँचाइ विकास डिभिजन कार्यालय महोत्तरीले जडान गरेको डिप बोरिङ चलाउनका लागि विद्युत्को तार त लागिएको छ। तर ट्रान्सफर्मर र अन्य उपकरण नहुँदा बोरिङ चल्न सकेको छैन। सिँचाइका लागि जडान गरिएको डिप बोरिङ प्रयोगमा आउन नसक्दा महोत्तरीका किसानका खेत सुख्खा बनेका छन्। लाखौँ खर्च गरी जडान गरिएका बोरिङ अलपत्र परेका छन्।

बोरिङ चलाएर उपभोक्ताबाट रकम संकलन गरी मर्मत नगर्दा सिँचाइ प्रभावित भएको भूमिगत जलस्रोत तथा सिँचाइ विकास डिभिजन कार्यालय जलेश्वरका इन्जिनियर अमलेश यादवले बताए।

विद्युतीकरण, सामान्य मर्मत, ट्रान्सफर्मर जडान, पम्प मर्मत, पाइपलाइन विस्तार, पुराना इन्जिन हटाएर नयाँसहितको विद्युतीकरण हुन नसक्दा डिभिजनले जडान गरेका २३ डिप बोरिङ सञ्चालनमा आउन नसकेको इन्जिनियर यादवले जानकारी दिए।

कतिपय स्थानमा विद्युत् महसुल नबुझाएको, उपभोक्ताले विद्युत् मिटर नलिएको, प्राधिकरणले लाइन काट्दा लामो समयदेखि बोरिङ नचल्दा बिग्रिएको छ। 'कतिपय बोरिङ चलाउन उपभोक्ता सक्रिय देखिएका छैनन्,' इन्जिनियर यादवले भने, 'डिभिजन कार्यालयले जडान गरेर सञ्चालन गरिरहेका ३१ बोरिङबाट ९८० हेक्टर क्षेत्रमा सिँचाइ भइरहेको छ। तर हामीले जडान गरेका २३ बोरिङ सञ्चालनमा छैनन्। चल्न नसकेका बोरिङलाई ४ करोड ५० लाख खर्च गरेर मर्मत गरी सञ्चालनमा ल्याउन सकिन्छ।'