पर्सा — पाँच महिनादेखि कुपोषित बालबालिकालाई खुवाउने पोषिलो दूध ‘एफ १००’ को मौज्दात सकिएपछि वीरगन्जस्थित पोषण पुनर्स्थापना केन्द्रमा आश्रित कुपोषित बालबालिकालाई केन्द्र प्रशासनले उक्त दूधको विकल्पमा ‘आरयूटीएफ’ अर्थात् ‘रेडी टू युज थेरापेटिक फुड’ दिन थालेको छ ।

केन्द्र प्रमुख सरिता यादवले पाँच महिनाअघि ‘एफ १००’ दूधको मौज्दात सक्किएपछि केन्द्रबाट उक्त दूध नआएकाले त्यसको विकल्प मानिने ‘आरयूटीएफ’ दिन थालिएको बताइन् । 

‘आरयूटीएफलाई एफ १०० कै विकल्प मानिन्छ,’ उनले भनिन्, ‘यसको एक प्योकटमा ५ सय क्यालोरी लगायत कुपोषित बालबालिकालाई चाहिने पोषणको मात्रा हुने गर्छ ।’ दाल, भात, तरकारी, दूध, दही, माछा, मासु, सागपात, फलफुल आदिसँगै नियमित रुपमा ‘आरयूटीएफ’ पनि दिने गरिएको उनले बताइन् । 

‘यो दूध संघीय स्वास्थ्य मन्त्रालय मातहतको स्वास्थ्य विभागले उपलब्ध गराउँदै आएको थियो,’ उनले भनिन्, ‘हामीले विभागको पथलैयास्थित स्टोरबाट नियमित रुपमा यो दूध ल्याउँथ्यौं, अहिले उक्त स्टोरमा पनि दूधको मौज्दात सक्किएको छ ।’