रौतहट — छात्रालाई अनुचित सन्देश पठाएको आरोप लागेका रौतहट गरुडाका एक शिक्षकलाई विद्यालयले बर्खास्त गरेको छ । शिक्षक विरुद्ध प्रहरीले अभद्र व्यवहारको मुद्दा चलाएपछि उनी अहिले प्रहरी हिरासतमा छन् ।  

गरुडा नगरपालिका–९ श्रीपुरस्थित श्रीमाध्यमिक विद्यालयका शिक्षक रवीन्द्रप्रसाद साहलाई विद्यालयले बिहीबार बर्खास्त गरेको हो । छात्रालाई अनुचित सन्देश पठाएको प्रकरण बाहिरिएपछि विद्यालय व्यवस्थापन समिति, वडा समिति, अभिभावक, राजनीतिक दलका प्रतिनिधि र समाजसेवीको संयुक्त बैठकले शिक्षक साहलाई बर्खास्त गरेको विद्यालय व्यवस्थापन समितिका निमित्त अध्यक्ष राजकुमार दासले जानकारी दिए ।

‘शिक्षक साहले पटकपटक छात्रालाई दुर्व्यवहार गरेको र सामाजिक दण्ड भोगे पनि कानुनी कारबाही नहुँदा मनोबल बढेको जस्तो देखियो,’ उनले भने, ‘विद्यालयको शैक्षिक वातावरण ठिक राख्नका लागि पनि शिक्षक साहलाई बर्खास्त गर्न जरुरी थियो । हामीले त्यही गरेका हौं ।’