जनकपुरधाम — मधेस प्रदेशसभा बैठकमा प्रतिपक्षी दलको अवरोध कायमै रहेको छ । बुधबार बसेको प्रदेशसभा बैठकमा प्रतिपक्षी दलहरूले आगामी आर्थिक वर्षको बजेटमा बिचौलिया हाबी रहेको भन्दै विरोध जनाएपछि सभामुख रामचन्द्र मण्डलले बैठक बिहीबार दिउँसो १ बजेसम्मका लागि स्थगित गरेका हुन् ।
बुधबार (आज) १ बजेका लागि बोलाइएको बैठक ३ बजेसम्म पनि बस्न नसकेपछि उक्त बैठकलाई स्थगित गर्दै ३ बजेर १० मिनेटमा बोलाइएको थियो तर करिब पौने ४ बजे बसेको बैठक समेत चल्न सकेको छैन । बैठक सुरु भएको चार मिनेटमै बैठक सभामुखले बिहीबार १ बजे सम्मको लागि स्थगित गरेको हो ।
जनता समाजवादी पार्टीका प्रमुख सचेतक रामअशिष यादवले प्रदेशसभा बैठकमा सत्तापक्षकै सांसदहरू अनुपस्थित रहेकाले उनीहरू पनि यस बजेट प्रति असन्तुष्ट रहेको बताए ।
बुधबार बैठक सञ्चालनका लागि सर्वदलीय बैठक बोलाइएको थियो । उक्त बैठक निष्कर्षविहीन रहेको थियो । बजेटको विषयमा छानबिन गर्न सभामुख रामचन्द्र मण्डलले कार्यदल बनाउन प्रस्ताव गरेपनि सरकार पक्षले त्यसलाई अस्वीकार गरेका थिए ।
असार १ गते मधेस सरकारले बजेट प्रस्तुत गरेपछि असार ११ गते बसेको बैठकमा करिब २३ मिनेट बजेटमाथि छलफल भएयता प्रदेशसभा बैठक सञ्चालन हुन सकेको छैन । बैठक चार पटक आह्वान भएपनि प्रतिपक्ष दलका सांसदहरूले निरन्तर अवरुद्ध गर्दै आएका छन् ।
