जनकपुर — मधेश प्रदेशसभा बैठक प्रतिपक्षी दलहरूले अवरुद्ध गरेका छन् । आइतबार बसेको बैठक जनता समाजवादी पार्टी (जसपा)सहित ६ दलका सांसदहरूले अवरुद्ध गरेका हुन् ।
बजेट संशोधनको माग राख्दै बैठक अवरुद्ध गरिएको जसपाका प्रमुख सचेतक रामआशिष यादवले जानकारी दिए । जनताले पनि सरकारको बजेट नरुचाएको भन्दै बजेट पुनः लेख्नुपर्ने माग उनले गरे ।
‘यो सरकारले पहिलो बजेट ल्याउँदा 'ह्याक' भएको भनिएको थियो । अहिले सत्तापक्षका सांसद र सरकारको नेतृत्व गरिरहेको दलका अध्यक्षले बजेटमा विचलन देखिएको प्रभाव परेको बताइरहेका छन्,’ उनले भने, ‘त्यसकारण यो बजेट पूर्ण रूपमा असमावेशी छ । पुनः लेखिएन भने सदन चल्न दिइने छैन ।’
नेकपा एकीकृत समाजवादीका प्रमुख सचेतक कनिस पटेलले बजेटमा बिचौलिया हाबी भएकाले पुनर्लेखन नभएसम्म सदन चल्न नदिने चेतावनी दिए । नेकपा (माओवादी केन्द्र)का नेता युवराज भट्टराईले पनि बजेट पुनः लेख्नुपर्ने माग राखे ।
जसपा, माओवादी केन्द्र, नेकपा (एस), नागरिक उन्मुक्ति, राप्रपा र नेपाल संघीय समाजवादी पार्टीका सांसदहरूले बैठक अवरुद्ध गरेका हुन् । सांसदहरूले बैठक अवरुद्ध गरेपछि सभामुख रामचन्द्र मण्डलले बैठक सोमबार दिउँसो १ बजेसम्मका लागि स्थगन गरेका छन् ।
