राजविराज — सप्तरीको हनुमाननगर कंकालिनी नगरपालिका–१ मा आइतबार दुइटा मोटरसाइकल एकआपसमा ठोक्किँदा दुई जनाको मृत्यु भएको छ ।
बिहान भलुवा जाने बाँधको भित्रि सडकमा भलुवातर्फ गइरहेको को १० प ५६२ र विपरीत दिशाबाट आउँदै गरेको बा ५५ प ६६३९ नम्बरको मोटरसाइकल एकआपसमा ठोक्किएर दुर्घटना भएको हो ।
दुर्घटनामा गम्भीर घाइते भएका दुवै मोटरसाइकल चालकको उपचारको क्रममा मृत्यु भएको एसपी ढकेन्द्र खतिवडाले जानकारी दिए । उनकाअनुसार ५६२ नम्बरको मोटरसाइकल चालक कञ्चनरुप नगरपालिका–१ बैरबाका ३४ वर्षीय ओमप्रकाश पञ्जियार र ६६३९ नम्बरको मोटरसाइकल चालक शम्भुनाथ नगरपालिका–११ राजपुरका १९ वर्षीय अविनाश मण्डलको मृत्यु भएको हो ।
घाइते भएपछि पञ्जियारलाई थप उपचारको लागि न्युरो अस्पताल विराटनगरमा पठाइएको थियो भने मण्डललाई गजेन्द्रनारायण सिंह अस्पताल राजविराज ल्याइएको थियो । दुर्घटनामा परेर घाइते भएका बैरबाकै ३० वर्षीय सुभाष महतोको न्युरो अस्पताल विराटनगरमा उपचार भइरहेको छ । दुर्घटनाबारे थप अनुसन्धान भइरहेको प्रहरीले जनाएको छ ।
