जनकपुर — ‘फिड द नेसन’ (देशलाई खाना खुवाउने) नीति ल्याएको मधेश प्रदेश सरकारले त्यसलाई पूरा गर्न अगामी बजेटमा अनाजसम्बन्धी योजनामा रकम विनियोजन गरेको छ । फिड द नेसनअन्तर्गत मधेश प्रदेश सरकारले दुई धान बालीलाई प्रवर्द्धन गर्न बजेट सुनिश्चित गरेको छ ।

भूमि व्यवस्था, कृषि तथा सहकारी मन्त्रालयलाई २ अर्ब ८३ करोड रुपैयाँ अगामी बजेटमा विनियोजन गरेको मधेश प्रदेश सरकारले कृषि र किसानसँग जोडिएका मसिना तर अनाजमा आत्मनिर्भर बनाउने योजनामा पनि बजेट राखेको छ । तराई–मधेशमा लोप अवस्थामा पुगेको तर विश्व बजारमा उच्च माग रहेको मखान खेतीको विकास र बिस्तार गरेर प्रशोधन, प्याकेजिङ, लेबलिङ र ब्रान्डिङका लागि मधेश सरकारले रकम विनियोजन गरेको छ ।

रैथाने बाली ओल, सोहिजन र कोदो खेतीको प्रवर्द्धन, संरक्षण, विकास र विस्तारमा पनि मधेश प्रदेश सरकारले रकम छुट्याएको छ । ‘किसानको बारी, स्वयंसेविकाको छहारी’ अन्तर्गत मधेश प्रदेशका सबै वडामा महिला कृषि स्वयंसेविका परिचालन गर्ने पनि तयारी छ ।

चुरे विनाशले क्षति ब्यहोरिरहेको तराई–मधेशमा जलचक्र सन्तुलनका लागि एकीकृत जलाधार संरक्षण गर्न ‘चुरे जोगाउ, मधेश बचाउ’ कार्यक्रमका लागि बजेट विनियोजन गरेको छ । बाढी, पहिरो तथा जलवायुजन्य विपद्‌बाट पीडित भएकालाई तत्काल राहत तथा क्षतिपूर्ति उपलब्ध गराउन पनि मधेश प्रदेश सरकारले रकम विनियोजन गरेको छ । यसअघि, विपद्‌बाट पीडित परिवारले राहतका लागि वर्षौ कुर्नुपर्थ्यो ।