जनकपुर — मधेश प्रदेशसभाको पाँचौँ अधिवेशनको पहिलो बैठक १ मिनेट पनि नबसी स्थगित भएको छ । योजना बिक्री र विभिन्न मन्त्रालयको बजेट खर्चमा अनियमितता भएको आरोप लगाउँदै विपक्षी दलहरूले संसदीय छानबिन समिति नबनेसम्म बैठक चल्न नदिने अडान राखेपछि सभामुख रामचन्द्र मण्डलले बुधबार बसेको प्रदेशसभाको बैठक स्थगित गरेको हो । 

बैठक सुरु भएलगत्तै विपक्षी दल जनता समाजवादी पार्टी नेपाल(जसपा)का सांसदहरूले उभिएर विरोध जनाएका थिए । जसपाका प्रमुख सचेतक रामाशिष यादवले संसदीय छानबिन समिति नबनेसम्म बैठक रोक्न सभामुखसमक्ष माग गरेका थिए । उनको मागमा सहमति जनाउँदै सभामुख मण्डलले प्रदेशसभाको बैठक सुरु भएको १ मिनेट पनि नपुग्दै बैठक स्थगितको घोषणा गरे । 

‘चौथो अधिवेशनको अन्तिम २२ औं बैठकमा सरकारले गरेको गडबडी र आर्थिक अनुशासन उल्लंघनका मामिलामा छानबिन गर्न संसदीय छानबिन समिति गठन गर्ने प्रस्ताव पास भएको थियो,’ जसपाका प्रमुख सचेतक यादवले भने,‘विपक्षी दलले समितिमा रहने सांसदको नामसमेत पठाइसकेको छ । तर, सत्तापक्षले नाम नदिँदा १ महिना २४ दिन बित्दा पनि संसदीय छानबिन समिति गठन हुन सकेको छैन ।’