जनकपुरधाम — स्वर्गीय नेता रामनारायण मिश्रको सालिक निर्माण स्थललाई लिएर विरोध सुरु भएको छ । जनकपुरधामको गंगा सागरपूर्व डिलमा निर्माण भइरहेको सालिकको बजरंग युवा क्लबको अगुवाइमा विरोध भएको हो ।
रामनारायण मिश्र स्मृति स्मारक समितिले मधेश प्रदेश सरकारको ५ करोड ७४ लाख ९६ हजार सहयोगमा सालिक निर्माण गरिरहेको छ । तर, सालिक निर्माणले ऐतिहासिक संरचना मास्ने भन्दै स्थानीयले विरोध गर्दै धर्नासमेत दिएका छन् । निर्माणस्थल छेउमै स्थानीय धर्नामा बसेका छन् । तर, काम पनि धमाधम भइरहेको छ ।
कानुनविपरीत सालिक निर्माण भइरहेकाले विरोध गरेको स्थानीय तथा एमाले नेता शिवशंकर साहले बताए । उनका अनुसार पोखरीको डिलभन्दा १० मिटर छाडेर कुनै पनि संरचना बनाउनुपर्ने प्रावधान छ । तर, पोखरीको डिल र वर्षौंदेखि सञ्चालनमा रहेको सडक अतिक्रमण गरी सालिक निर्माण भइरहेकाले विरोध गरिएको हो । ‘योग्य व्यक्तिको सालिक बनाउनुपर्छ, यसमा कुनै विरोध होइन,’ उनले भने, ‘तर, ठाउँ उपयुक्त भएन । यो एतिहासिक ठाउँ मासेर सालिक निर्माण हुनुभएन । गंगासागरलाई कुरूप बनाउने काम हामीलाई सैह्य छैन ।’
जनकपुरधाम उद्योग वाणिज्य संघका अध्यक्ष सुरेन्द्र भण्डारीले निर्माण कार्य नरोकिए चरणबद्ध आन्दोलन गर्ने चेतावनी दिए । उनले वैकल्पिक र उपयुक्त ठाउँमा सालिक निर्माण गर्न सरकारलाई सुझाव दिएको पनि बताए । ‘सर्वपक्षीय बैठक गरेर निर्णय गरौं । उहाँको धेरै योगदान छ, उहाँका नाममा अझ शैक्षिक संस्थान र अस्पतालहरू नै बन्नुपर्छ,’ उनले भने, ‘तर उपयुक्त ठाउँमा बनाऔं । यो ठाउँ उपयुक्त छैन ।’ सालिकका नाममा एतिहासिक धरोहर पोखरी मास्ने काम भइरहेको उनले बताए ।
व्यक्तिको नाममा रहेको जग्गालाई रामनारायण मिश्र स्मृति स्मारक समितिका नाममा नामसारी गरेर ०७९ सालमा जनकपुरधाम उपमहानगरपालिकाबाट नक्सापास गराइएको थियो । दुई वर्षअघि सम्झौता भए पनि स्थानीयको विरोधका कारण गत वर्ष काम हुन सकेको थिएन ।
पूर्वाधार विकास कार्यालय धनुषाकी इन्जिनियर सुम्मी मिश्रले साढे दुई तल्ले भवन बनिरहेको जानकारी दिइन् । कर्मा बाबा जेभी निर्माण कम्पनीले निर्माण गरिरहेको छ । ०८२ फागुन २८ सम्म निर्माण सम्पन्न गरिसक्नुपर्ने समयावधि तोकिएको छ ।
