रौतहट — रौतहटको गरुडा नगरपालिका-८ बिर्ताचोकमा 'घुमुवा प्रहरी हुँ' भन्दै स्थानीयसँग रकम असुलेको आरोपमा प्रहरीले शनिबार एकजनालाई पक्राउ गरेको छ ।
बिर्ता घर भएका ४४ वर्षीय शेख सदरे आलमलाई बिर्ताचौकीबाट खटिएको टोलीले पक्राउ गरेको जिल्ला प्रहरीका डीएसपी दिपककुमार रायले जानकारी दिए । आलमले किसानको मलखाद रोकेर जिल्ला प्रहरीको घुमुवा हुँ भन्दै रकम माग्ने गरेको सूचना पाएपछि पक्राउ गरिएको डीएसपी रायले बताए । ‘आलमले कहिलेदेखि प्रहरीको घुमुवा भनेर ठग्ने गरेको भन्ने अनुसन्धानपछि थाहा हुन्छ,' उनले भने,‘हामीले सोधपुछ थालेका छौं । ठगी गर्नुको कारण पनि खुल्छ ।’
आलमले डरत्रास देखाएर रकम असुल्ने गरेको प्रहरीको भनाइ छ । प्रहरीले आलमलाई हिरासतमा राखेर सोधपुछ थालेको जनाएको छ ।
