सिरहा — सिरहाको गोलबजार नगरपालिका–३ स्थित धमिनी खोलामा कजवे निर्माण भएको छ । नगरपालिकाले श्रम-प्रधान सार्वजनिक निर्माण कार्य विकास कार्यक्रमको सहयोगमा खोलामा कजवे निर्माण गरेको हो ।
नगरपालिकाका अनुसार, कजवे निर्माणमा १५ लाख रुपैयाँ खर्च भएको छ । उपभोक्ता समितिमार्फत बनेको यो पुलको निर्माण कार्यमा स्थानीयले श्रमदान गरेका थिए । पुलको निर्माण १८-२० दिनमै सम्पन्न भएको स्थानीय नरबहादुर आलेले बताए ।
यो खोलामा पुल नहुँदा लामो समयदेखि स्थानीयले सास्ती खेप्दै आएका थिए । 'हामीलाई अनागरिक जस्तो महसुस हुन्थ्यो,' आले सुनाउँछन्, 'हामीले वर्षायाममा बाढी आउँदा गाउँमै थुनिएको अवस्थाहरू भोग्नुपर्यो ।'
तर, खोलामा पुल निर्माण भएसँगै अब गोलामुक्सारका स्थानीयलाई सहज भएको छ । गोलामुक्सारमा जम्मा एक सय हाराहारी घरपरिवारको बसोबास रहेको गोलबजारका नगर प्रमुख श्यामकुमार श्रेष्ठले बताए ।
