धनुषा — महोत्तरीको पिपरा सहोडवाका मुसाफिर झा र गीतादेवी झा हत्या मुद्दाको नियमित सुनवाइ स्थगित भएको छ ।

जिल्ला अदालतमा बिहीबार हत्या मुद्दाको नियमित सुनवाइ भइरहेको थियो । अभियुक्तका तर्फबाट बहस भइरहेकै बेला इजलास नं. ६ की न्यायाधीश फणेश्वरी घिमिरले बीचमै बहस रोकेर सुनवाइ स्थगित गरेकी हुन् ।

न्यायाधीश घिमिरे र अदातलका कर्मचारी झाको घरमा बुधबार पुगेर गरिएको संवादमाथि अधिवक्ताहरुले शंका गरिरहेका अवस्थामा सुनवाइ स्थगित भएको हो । बहसको तेस्रो दिन बिहीबार न्यायाधीशले केही कागजात हेर्न बाँकी रहेकाले बहस रोक्न भनेको मृतकका छोरा मनीष झाले बताए ।

'अदालतमा दुई दिनदेखि भइरहेको क्रियाकलापले न्याय नपाउने हो कि भन्ने शंका लाग्न थालेको छ,' मनीषले भने, ‘घरमा आएर न्यायधीश घिमेरेले थुनामा रहेका हत्याका मुख्य योजनाकार भारतीय नागरिक हरेन्द्र ठाकुरको मिसिलमा कुनै प्रमाण नरहेको बताएपछि आर्थिक चलखेल भएको हुन सक्ने शंका लाग्न थालेको छ ।’ घरमै गएर न्यायधीशले गरेको संवाद र इजलाश नंं. ६ मै लगातार ५ चोटी पेशी पर्नु, अन्य इजलासमा पेशी पर्दा अभियुक्तका तर्फबाट पेशी सारिनुले शंका बढेको उनको भनााइ छ ।