सिरहा — सिरहामा रातारात वन मासेर ग्राभेल उत्खनन गरिएको छ । सिरहाको गोलबजार नगरपालिका-१० स्थित चुरे चौफाल सातपत्रे सामुदायिक वनबाट ग्राभेल उत्खनन गरिएको हो । संघीय सरकारको बजेटमा धर्मपुर-चोहर्वा-देवीपुर-विष्णुपुर २० किलोमिटर सडकको निर्माण कार्य गरिरहेको ब्रदर्श कन्स्ट्रक्सनले शुक्रबार राति वनमा उत्खनन गरेको खुलेको छ ।

स्थानीय भीमबहादुर थापाका अनुसार रातिको समयमा ठेकेदार कम्पनीले जीसेबी लगाएर वनका करिब ७० वटा सालका रूख ढालेर त्यहाँबाट ग्राभेल उत्खनन गरेको हो । यसमा वन समिति, वन कार्यालय, जनप्रतिनिधिदेखि प्रशासनसम्मको मिलेमतो रहेको उनको आरोप छ ।

'यो त डकैती हो, सबैको मिलेमतोबिना यो सम्भव हुँदैन,' उनले कान्तिपुरसित भने, 'हामीले समिति, मेयर, प्रहरी प्रशासन सबैलाई गुहार्यौं, तर कसैले नसुन्नुले उनीहरूको मिलेमतो पुष्टि हुन्छ ।'