सिरहा — माघ ५ अर्थात् आजकै दिन २०६३ सालमा मधेश आन्दोलनका क्रममा पहिलोपटक सिरहाको लहानमा रमेश महतोको माओवादी कार्यकर्ताको गोली लागी ज्यान गएको थियो । त्यसपछि मधेशभर आन्दोलन चर्कियो । त्यसयता आजको दिनलाई मधेश केन्द्रित दलहरूले बलिदानी दिवसका रूपमा मनाउँदै आएका छन् । यसै विषयमा केन्द्रित रहेका जसपा नेपालका अध्यक्ष उपेन्द्र यादवसँग कान्तिपुरका विनय आजादले गरेको कुराकानी  :

आजको दिनलाई कसरी सम्झिनुहुन्छ ?

आजको दिन त्याग, संघर्ष, बलिदान र वीर सपुतहरूलाई सम्झिने दिन हो । आजको दिन शोषित-पीडित जनताको मुक्तिका लागि, दासत्वको जीवनबाट मुक्ति पाउनका लागि वीर सपुतहरूले बाँच्नुभन्दा आफूलाई बलिदान गरेर जुन बाटो देखाइदिनुभयो, त्यसलाई सम्झिने दिन हो । उहाँहरूलाई सम्झिँदै मुक्तिका लागि हामी लड्नुपर्छ, त्यसको विकल्प छैन ।

मधेश आन्दोलनका सहिदहरूका जे सपना थिए, त्यो पूरा भएन, तपाईंहरू सत्तालिप्सामा लाग्नुभयो भन्ने आरोप छ नि, के भन्नुहुन्छ ?

यो गलत कुरा हो । प्रतिशोधपूर्ण आरोप हो । मधेशीहरूले अवसर पाएको कुरा शासकहरूलाई पचिरहेको छैन । त्यसैले संकीर्ण अनि नश्लीय सोंच र चिन्तन भएकाहरूले यस्तो गलत भाष्य बनाएका हुन् । मुलुकमा सधैंभरि रजगज गर्ने उनीहरू हुन् । हामी अझै संघर्षको बाटोमा छौं । आन्दोलनबाट प्राप्त उपलब्धिलाई संरक्षण गर्ने र बाँकी रहेका अधिकार, सामाजिक न्याय, समानता, स्वतन्त्रता, हक अधिकारका लागि एकताबद्ध भएर संघर्ष गर्ने दिशामा अगाडि बढिरहेका छौं ।