रौतहट — गौर नगरपालिका–२ स्थित जुद्धमाविको छात्राबास भवन निर्माण १९ वर्षदेखि अलपत्र छ । मधेश आन्दोलन, भूमिगत संगठनको दबाब र मूल्यबृद्धिको बाहना बनाउँदै ठेकेदारले निर्माण रोकेर जिल्ला छाडेपछि भवन निर्माण अलपत्र परेको हो । ठेकेदार भागेपछि अब कसले बनाउने भन्ने अन्यौल छाएको छ ।

भारतीय दुतावासको सहयोगमा निर्माणाधीन छात्रबास भवन काम सम्पन्न नहुँदै जीर्ण बनेको छ । छात्रावास भवन नभएपछि यहाँ विद्यार्थीको संख्या घट्दो छ। जुद्ध मावि राणाकालमा स्थापना भएको जिल्लाकै पुरानो विद्यालय हो । विद्यार्थीको चाप बढेर ग्रामीण भेगबाट होस्टल खोज्दै आउन थालेपछि स्थानीयको पहलमा दुताबासले छात्रावास बनाउन आर्थिक सहयोग गरेको थियो। तर लामो समयसम्म निर्माण नसकिँदा शिक्षक, विद्यार्थी र अभिभावक निराश छन् ।

ठेक्का रद्द भइसकेको अवस्थामा भवन कसले बनाउने भन्ने अन्यौल छाएको छ । दूतावासको १ करोड ९८ लाख ८० हजार सहयोगमा बन्न लागेको छात्रावास भवनको काठमाडौंको गोर्खा, स्काई र क्यानिजियो कन्ट्रक्सन जेभीले संयुक्त रुपमा ठेक्का लिएका थिए। भवनको सम्झौता ०६२ पुष १४ गते भएको हो ।

सोही वर्ष काम सुरु गरी ०६४ असार १३ गतेभित्र सम्पन्न गरी हस्तान्तरण गर्नुपर्ने समय तोकिएको थियो । ठेकेदारले मूल्यबृद्धि, मधेश आन्दोलन, भूमिगत समूहको चन्दा आतंकलगायत बिभिन्न बहाना बनाएर बीचैमा निर्माणको काम रोके पछि १९ वर्षदेखि भवन अलपत्र छ । यस बीच विद्यालय प्रशासनले ठेकेदार कम्पनीसित पटक/पटक सम्पर्क गरेको थियो ।

उनीहरु सम्पर्कमा नआए पछि भवन निर्माणको आश मरेको विद्यालयका प्रधानाध्यापक प्रभाषकुमार ठाकुरले बताए । ‘अब भवन बन्छ भन्ने कुनै ग्यारेन्टी छैन । अलपत्र भवन बनाउने पहल हुनु जरुरी छ,’ उनले भने, ‘गरिब जेहेन्दार विद्यार्थीको होस्टलमा बसेर पढ्ने सपना अधुरो जस्तै भएको छ ।’

ठेकेदारले निर्माणको काम छाडे पछि तत्कालीन जिल्ला विकास समितिले रेखदेखको जिम्मा लिएको थियो । समितिले निर्माण पूरा गर्न पटक/पटक ताकेता गरे पनि ठेकेदारले अटेर गरे पछि तत्कालीन जिविसले २०६९ फागुन ५ गते ठेक्का तोडेर हर्जानासहित कालोसूचीमा राख्न सार्वजनिक खरिद अनुगमन कार्यालयमा सिफारिस गरेको थियो । ठेकेदारले मूल्य समायोजनको माग अघि सारे पनि सम्पर्कमा नआएपछि २०७० मा ठेक्का रद्द गरेको गौर नगरपालिकाले जानकारी दिएको छ ।

नगरप्रमुख शम्भु साह र भारतीय महावाणिज्य दूतावास वीरगन्जका काउन्सिलर देवीसराय मिना बीच केही दिनअघि भवन निर्माण सम्पन्न गर्ने विषयमा छलफल भएको थियो । ‘अहिले नगरपालिकाले ५० लाख बजेट विनियोजन गरेको छ । यसबाट के कति काम गर्न सकिन्छ,’ नगरप्रमुख साहले भने,‘सकेसम्म पूरा गर्ने योजना बनाएका छौं । बजेटले भ्याएसम्मको काम गर्छौं ।’ दूतावासले सहयोग गर्ने मनसाय राखे पनि ठेकेदारको कामप्रति सन्तुष्ट देखिएको छैन ।