रौतहट — केही दिनयता अत्यधिक चिसो बढ्न थालेपछि रौतहटका स्थानीय तहहरूले धमामध विद्यालय बन्द गर्न थालेका छन् । बुधबारसम्म १८ स्थानीय तहमध्ये अधिकांशले चिसोका कारण दुई दिनसम्म विद्यालय बन्द गरेका छन् ।

जिल्लाको गौर, ईशनाथ, चन्द्रपुर, वृन्दावन, फतुवाविजयपुर, राजदेवी, यमुनामाई, गोनाहीदेबाही नगरपालिकाले २६ गते शुक्रबारसम्मका लागि विद्यालय बन्द गरेको हो ।

गौर नगरपालिकाले अत्यधिक चिसो बढेको भन्दै ३ दिन गौर नगर क्षेत्रको विद्यालय बन्द गरेको प्रमुख प्रशासकीय अधिकृत सुभाष ठाकुरले जानकारी दिए ।

चन्द्रपुर नगरपालिकाका शिक्षा शाखाका अधिकृत दीपेन्द्र मण्डलले बढ्दो चिसोले विद्यालयका बालबालिकाहरू प्रभावित हुन थाले पछि दुई दिनका लागि विद्यालय बन्द गर्नु परेको बताए । चिसो बढ्न थाले पछि जिल्लाको जनजीवन प्रभावित भएको छ । मानिसहरू घरबाट बाहिर निस्कन सकेका छैनन् ।