परासी — पश्चिम नवलपरासीको बर्दघाटस्थित चिसापानी नगर अस्पतालमा सर्पदंशविरुद्धको औषधि अभाव भएको छ ।

अस्पतालमा सर्पदंशको उपचारका लागि आउनेको संख्या बढे पनि एन्टी स्नेक भेनम अभाव भएपछि बिरामीले सदरमुकाम परासी वा जिल्ला बाहिर जानुपर्ने बाध्यता रहेको छ । 

चिसापानी अस्पतालका निमित्त मेडिकल सुपरिटेन्डेन्ट अभिषेक चापागाइँका अनुसार केही दिनदेखि अस्पतालमा एन्टी स्नेक भेनम अभाव भएको र प्रदेश स्वास्थ्य सेवा विभागमा माग गरिएको बताए । ‘विषालु सर्पले टोकेका बिरामी आएमा फिर्ता पठाउनुपर्ने अवस्था छ,’ उनले भने,‘अहिले अस्पतालमा १५ भेनम औषधि मात्रै छ । एउटा बिरामीलाई नै १० भेनम दिनुपर्ने हुन्छ ।’

सर्प उद्धारकर्ता दुर्गा लामिछानेका अनुसार अहिले सर्पदशंका घटना बढेको र घरभित्र पसेका सर्प उद्धारका लागि दैनिक ५/१० फोन आउने गरेको बताए । शनिबारमात्र बर्दघाट नगरपालिकामा एउटै घरबाट गोमन सर्पको ११ वटा बच्चाको उद्धार गरिएको बताए । सर्पदशंका घटना बढ्दै जाँदा अस्पतालमा एन्टी स्नेक भेनम नहुँदा समस्या परेको र तत्काल प्रदेश बाट औषधि आपुर्ति गर्नुपर्ने उनले बताए ।