लुम्बिनी — लुम्बिनी र बनारसबीच पर्यटन प्रवर्द्धन गर्दै यी क्षेत्रलाई थप पर्यटकीय गन्तव्य बनाउने उद्देश्यले लुम्बिनीमा लुम्बिनी–बनारस बीटूबी ट्राभल मार्ट तथा फ्याम ट्रिप सुरु भएको छ । बुद्ध जन्मस्थल लुम्बिनीको अध्यात्मिकतालाई भारतको सांस्कृतिक राजधानी मानिने बनारससम्म जोडेर पर्यटन प्रवर्द्धन गर्ने उद्देश्यले ट्राभल मार्ट आयोजना गरिएको हो । 

कतैबाट कुनै सहयोग नलिएर लुम्बिनी होटल संघले आफ्नै पहलमा थालेको यो कार्यक्रममा भारतको बनारसका साथै दिल्ली, लखनउ र बौद्धगयाका ४० जना सानाठूला ट्राभल एण्ड टूर अपरेटर कम्पनीका प्रतिनिधि र होटेलियर सहभागी छन् । कार्यक्रममा लुम्बिनी र बनारसका ट्राभल एण्ड टूर अपरेटर कम्पनीका प्रतिनिधि र होटेलियरबीच छलफल, अन्तर्क्रिया र होटलका प्याकेज र सुविधाका बारेमा छलफल हुने लुम्बिनी होटल संघका अध्यक्ष लीलामणी शर्माले बताए । ‘दुवै ठाउँका होटलका प्याकेजहरू आदान–प्रदान हुन्छन्,’ उनले भने, ‘यसले जसलाई जहाँ सुविधा भयो, त्यही होटलमा पाहुना पठाउँछन् ।’

सोमबार मध्याह्नबाट सुरु भएको ट्राभल मार्ट बुधबार सकिनेछ । लुम्बिनीमा निजी स्तरबाट सञ्चालन भएको यो पहिलो ट्राभल मार्ट पनि हो । यसले लुम्बिनीको पर्यटन प्रवर्द्धन, अन्तर्राष्ट्रिय बजार विस्तार र नेपाल–भारतबीच धार्मिक र सांस्कृतिक पर्यटन प्रवर्द्धन गर्न थप सहयोग हुने लुम्बिनी होटल संघका सल्लाहकार खिम श्रेष्ठले बताए । कतै कुनै सहयोग नदिई स्वस्फूर्त रूपमा लुम्बिनीकै होटल व्यवसायीले आफ्नो होटलमा बास र खानाको प्रबन्ध गरी पर्यटन प्रवर्द्धनका लागि कार्यक्रम गरिएको उनले बताए । 

लुम्बिनीमा चारतारेदेखि बजेट फ्रेन्डली ८३ वटा होटल र रेस्टुरेन्ट छन् । लुम्बिनी राजकुमार सिद्धार्थको जन्मस्थलका रूपमा विश्वमै चिनिएको छ । विश्व शान्तिको मुहान लुम्बिनीलाई हिन्दु पौराणिक कथामा मोक्ष नगरी मानिने बनारससँग जोडेर पर्यटकीय गन्तव्यका रुपमा विकास गर्नु महत्त्वपूर्ण हुने लुम्बिनी बौद्ध विश्वविद्यालयका उप–प्राध्यापक सिरी बजिरले बताए ।