भैरहवा–परासी सडकखण्डमा ३० चालक परीक्षण गर्दा ५ जनाले लागुपदार्थ सेवन गरेको पाइएको छ।
परासी — पश्चिम नवलपरासीमा लागुपदार्थ सेवन गरेर सवारी चलाउने ५ जना चालकलाई प्रहरीले नियन्त्रणमा लिएको छ ।
जिल्ला प्रहरी कार्यालय र ट्राफिक प्रहरीले संयुक्तरुपमा मादक पदार्थ सेवन र लागुपदार्थ सेवनको जाँच गर्दा लापसे गरेको भेटिएपछि नियन्त्रणमा लियर मुद्दा चलाउने तयारी भैरहेको छ ।
जिल्ला प्रहरी कार्यालय परासीका डिएसपी मदन थापाका अनुसार ३० जना चालकमा गरिएको परीक्षणमा ५ जनाले लागुपदार्थ सेवन गरेको पुष्टि भएको बताए ।
भैरहवा–परासी सडक खण्डमा चालकको परीक्षण गरिएको थियो । मापसे सेवन गर्दा यात्रु र प्रहरीले थाहा पाउने भएपछि पछिल्लो समय चालकले लागुपदार्थ सेवन गरेर सवारी चलाएको भेटिएको हो ।
लागुऔषध सेवन गरी तीव्र गति र लापरवाहीका साथ सवारी चलाउँदा दुर्घटनाको जोखिम बढेकाले मापसे र लापसे परीक्षणलाई तिब्रता दिएको प्रहरीले जनाएको छ ।
