नवलपरासी — पश्चिम नवलपरासीको पाल्हीनन्दन गाउँपालिका उपाध्यक्ष पद रिक्त भएको छ । निर्वाचन आयोगले मंगलबार गोरखापत्रमा सूचना निकालेर उपाध्यक्ष फातुमा खातुन अन्सारी पदमुक्त भएको जानकारी दिएको हो । 

आयोगले राजनीतिक दलसम्बन्धी कानुन तथा नियमावलीअनुसार अन्सारी निर्वाचित दलवाट प्राप्त  निर्णयका आधारमा निर्वाचित गाउँपालिकाको उपाध्यक्ष पद स्वतः रिक्त भएको जनाएको हो ।

अन्सारी २०७९ सालको स्थानीय निर्वाचनमा कांग्रेसबाट निर्वाचित भएकी थिइन् । गत प्रतिनिधिसभा निर्वाचनमा उनले कांग्रेसका उम्मेदवारलाई हराउनका लागि रास्वपाका उम्मेदवारलाई भोट मागेको भनेर कांग्रेस पार्टीको जिल्ला अनुशासन समितिले कारबाहीका लागि निर्वाचन आयोगमा सिफारिस गरिदिन कांग्रेस केन्द्रमा पत्र पठाएको थियो । केन्द्रको निर्णयअनुसार आयोगले उनको पद रिक्त भएको मंगलबार प्रशासन गरेको गोरखापत्रको सूचनामा उल्लेख गरेको छ ।

कुनै पनि दलबाट निर्वाचित जनप्रतिनिधि अन्य दलमा प्रवेश गरेकोबारे सम्बन्धित दलको केन्द्रीय समितिले निर्णय गरी पठाएपछि उनीहरूको पद रिक्त हुने कानुनी व्यवस्था छ ।

यसैबीच फातुमासहित नवलपरासीबाट ४३ जना नेता–कार्यकर्तालाई कारबाहीका लागि केन्द्रमा सिफारिस गरिएको थियो । उनीहरूमध्ये ६ जना निर्वाचित जनप्रतिनिधि रहेका छन् ।

कारबाहीका लागि सिफारिस गरिएका अन्य जनप्रतिनिधिमा लुम्बिनी प्रदेशमा हाल वन तथा वातावरण मन्त्री रहेका देवकरण कलवार, सुस्ता गाउँपालिकाकी उपाध्यक्ष गीता चौधरी, बर्दघाट नगरपालिका–१० का वडाध्यक्ष राजु मिश्र, वडा नम्बर ९ का वडा सदस्य बालिन्द्र विक्रम शाही र सुनवल नगरपालिका–२ का वडा सदस्य विकास क्षेत्री रहेका छन् । 

कांग्रेसका जिल्ला सचिव उमेशचन्द्र यादवका अनुसार कारबाहीका लागि सिफारिस भएका ती सबै जनप्रतिनिधिले खुलेर राष्ट्रिय स्वतन्त्र पार्टीका उम्मेदवारलाई मत मागेको आरोप छ ।  पश्चिम नवलपरासीको क्षेत्र नम्बर १ र २ वाट कांग्रेसका पूर्वनेताहरू क्रमश: विक्रम खनाल र नरेन्द्र गुप्ता प्रतिनिधि सभा सदस्यमा निर्वाचित भएका छन् ।