अत्याधिक गर्मी बढेपछि पश्चिम नवलपरासीको प्रतापपुर गाउँपालिकाले दुई दिन विद्यालय बिदा गरेको छ ।
परासी — अत्याधिक गर्मी बढेपछि पश्चिम नवलपरासीको प्रतापपुर गाउँपालिकाले दुई दिन विद्यालय बिदा गरेको छ । चर्को घाम, तातो हावा चलेको कारण बालबालिकाको स्वास्थ्यलाई मध्यनजर गर्दै बिदा दिएको हो ।
गाउँपालिकाका अध्यक्ष उमेशचन्द्र यादवले सूचना जारी गर्दै असार ४ र ५ गते पालिकाभित्रका सबै शैक्षिक संस्थामा बिदा दिने निर्णय भएको जानकारी दिएका छन् ।
दिउँसोको समयमा बाहिर हिँडडुल गर्न कठिनाइ हुने र केही विद्यालयमा जस्तापाताको छाना भएकाले अत्याधिक गर्मी हुने कारणले बिदा गरिएको गाउँपालिकाले जनाएको छ ।
जिल्लाको सदरमुकाम परासी र आसपासको क्षेत्रमा केही दिनदेखि तातो हावा चल्ने र गर्मी बढेपछि जनजीवन प्रभावित बनेको छ । जिल्लाका अन्य पालिकाले पनि बिदा दिने तयारी गरेका छन् ।
