लुम्बिनी — शान्तिका लागि भिक्षुका पाइला पछ्याउँदै अमेरिकामा १ सय ८ दिनसम्म हिँडेको अलोका कुकुर बुद्ध जन्मस्थल लुम्बिनी आएर काठमाडौं पुगेको छ । 

आज त्यही कुकुर विश्वभर ‘शान्तिको दूत’ (पिस डग) का रूपमा परिचित छ । ‘इन्डियन परिया’ प्रजातिको यो कुकुरलाई अहिले संसारले ‘अलोका’ नामले चिन्छ । अमेरिकामा हिँड्दै ३ हजार ७ सय किमि शान्ति पदयात्रा गरेर उक्त कुकुर आइतबार साँझ साढे ६ बजे लुम्बिनी पुगेको हो । 

भियतनामी भिक्षु पन्याकरको नेतृत्वमा अमेरिकामा भएको वाक फर पिस (शान्ति पदयात्रा)को प्रमुख आकर्षणका रूपमा रहेको अलोका लुम्बिनी पुग्दा हेर्न र तस्बिर खिचाउन भिक्षु भिक्षुणी, उपासक उपासिकाको भीड लागेको थियो । अनुशासित र शान्तिप्रिय अलोकाले करुणाको प्रतीकका रूपमा सबैको मन जितेको थियो । अलोका सोमबार बिहान साढे ९ बजे बुद्ध एयरको फ्लाइट नं ८५२ बाट १८सी सिटमा बसेर भिक्षु पन्यकारसँगै काठमाडौं पुगेको थियो । 

काठमाडौंस्थित त्रिभुवन अन्तर्राष्ट्रिय विमानस्थलबाट अलोका सिधै बौद्धनाथ पुगेको र त्यसपछि चारुमती, आनन्दकुटी र स्वयम्भूनाथ भ्रमण गरेको थियो । सोमबार साँझ संस्कृति तथा पर्यटन मन्त्री खड्गराज पौडेलसँग भेटघाट भएको थियो । एयरपोर्टमा भव्य स्वागत गरिएको थियो । अलोका मंगलबार विहान ८ बजे नयाँ दिल्ली जाने कार्यक्रम रहेको छ । बुधबार भिक्षु पन्याकारसहित अलोका अमेरिका उड्ने नेपाल यात्राका समन्वयकर्ता भिक्षु मैत्री महास्थवीरले बताए । 

अलोकाको लुम्बिनी दोस्रो भ्रमण हो । यसअघि भिक्षु पन्याकार सन् २०२२ मा भारतमा पदयात्रा गर्दा अलोकाले पछ्याएको थियो । त्यसबेला झन्डै १ सय दिनसम्म भिक्षुहरूसँग हिँड्दा लुम्बिनीसमेत आएको थियो । त्यतिखेर पन्याकारले ३ हजार ४ सय किमि शान्ति पदयात्रा गरेका थिए । २०२५ को अन्त्यमा भिक्षु पन्याकारसहितको टोलीले टेक्सासबाट यात्रा सुरु गर्ने निर्णय गरेपछि कुकुरलाई भारतको कलकत्ताबाट अमेरिका लगिएको थियो । अमेरिका लगेर कुकुरको नाम अलोका राखिएको हो ।