जालिरामले गोरुको नाक, मुख माटोमा गाडी, कुटी, हिर्काइ भिडियो बनाई फेसबुक र टिकटकमा पोस्ट गरेका थिए ।
प्यूठान — गोरुलाई निर्दयी व्यवहार गरी सामाजिक सञ्जालमा भिडियो पोस्ट गर्नेलाई प्रहरीले पक्राउ गरेको छ । खेतमा जोतिरहेका बेला नहिँडेपछि गोरुको नाक र मुख माटोमा गाडेका जालिराम थापालाई पक्राउ गरिएको हो ।
जिल्ला प्रहरी कार्यालय प्यूठानका सूचना अधिकारी प्रहरी निरीक्षक हरि भट्टराईका अनुसार गौमुखी गाउँपालिका वडा नं १ बस्ने ३६ वर्षीय जालिरामलाई पक्राउ गरिएको हो । जालिरामले गोरुको नाक, मुख माटोमा गाडी, कुटी, हिर्काइ भिडियो बनाई फेसबुक र टिकटकमा पोस्ट गरेको भट्टराईले जानकारी दिए ।
मुलुकी अपराध संहिता, २०७४ को परिच्छेद २७ को दफा २९० बमोजिम पशुपन्छीप्रति निर्दयी व्यवहार गर्न नहुने कुसरमा मुद्दा दर्ता गरिएको उनले बताए । जिल्ला प्रशासन कार्यालय प्यूठानबाट ५ दिन म्याद थप भई आवश्यक अनुसन्धान भइरहेको उनको भनाइ छ ।
