पाल्पा — चालु आर्थिक वर्षमा बालविवाह अन्त्य गर्ने लक्ष्य लिएको पाल्पाको निस्दी गाउँपालिकामा २० वर्ष उमेर पुगेर कक्षा १२ उत्तीर्ण गरी विवाह गर्ने २७ जना महिलालाई नगदसहित सम्मान गरिएको छ । 

आर्थिक वर्ष २०८१ साउन १ देखि २०८२ वैशाख ३१ गतेसम्म निस्दी गाउँपालिकाभित्र स्थायी बसोबास गरिरहेका कक्षा १२ उत्तीर्ण गरी २० वर्ष उमेर पुगेर विवाह गर्ने महिलालाई प्रोत्साहन पुरस्कार दिइएको हो । आठौं राष्ट्रिय महिला अधिकार दिवसका अवसरमा गाउँपालिकाका आयोजित कार्यक्रममा सातवटै वडाबाट प्रतिनिधित्व गर्ने महिलालाई प्रोत्साहन स्वरुप ५ हजार नगद, दोसल्लासहित सम्मानपत्र प्रदान गरिएको छ । सम्मानित हुनेहरूसँग वडा कार्यालयमार्फत नागरिकताको प्रमाणपत्र, कक्षा १२ उत्तीर्ण गरेको शैक्षिक प्रमाणपत्र, विवाह दर्ता प्रमाण पत्रको प्रतिलिपि माग गरेको थियो ।

बालविवाह न्यूनीकरणका लागि सचेतना जगाउन तथा महिलालाई शिक्षामा आकर्षित गर्न नगदसहित सम्मान गरेको लुम्बिनी प्रदेशसभा सदस्य इन्द्रा गहतराजले बताइन् । उनले महिलालाई उद्यमसँग जोड्न सकियो भने अझ यस्ता कार्य प्रभावकारी हुने बताइन् । २०७९ सालसम्म २ सय ७६ जोडीले बालविवाह गरेको निस्दी गाउँपालिकामा चालु आर्थिक वर्षमा भने सात जोडीमा सीमित बनेको गाउँपालिका उपाध्यक्ष तिरनकुमारी श्रेष्ठले बताइन् । सात जोडीलाई समेत पालिकाले उमेर नपुग्दै विवाह गरेको भन्दै आ–आफ्नो घर फिर्ता गरेको उनले बताइन् । 

निस्दी गाउँपालिकाले बालमैत्री गाउँपालिका घोषणाका लागि विभिन्न कार्यक्रम संचालन गर्दै आएको प्रमुख प्रशासकीय अधिकृत पूर्णबहादुर चितौरेले बताए । गाउँपालिकाले त्यस्ता महिलालाई सम्मान गर्न एक महिनाअघि नै सूचना जारी गरेर वडामार्फत आवेदन माग गरेको थियो । अधिकार दिवसकै अवसरमा आधारभूत तह, एसईई, कक्षा १२ मा निस्दी गाउँपालिकाभित्रबाट उत्कृष्ट अंक ल्याउनेलाई पनि नगद, दोसल्ला, सम्मानपत्रसहित सम्मानित गरिएको छ । 

यसैगरी पालिकाभित्रबाट अघिल्लो वर्ष स्नातकोत्तर तह उत्तीर्ण गर्ने एक जना महिलालाईसमेत नगदसहित सम्मान गरिएको छ । यस्तै निस्दी गाउँपालिकाभित्र सहकारी दर्ता गरी उद्यम विकासमा अन्तर्राष्ट्रिय क्षेत्रमा अदुवा र सिमी पठाउन सफल गल्धा सामाजिक उद्यमी महिला सहकारीलाईसमेत नगदसहित सम्मान गरिएको महिला विकास शाखा प्रमुख तथा बालअधिकार अधिकृत कुस्माखर पाण्डेयले बताए । 

महिलालाई उच्च शिक्षा ग्रहण गर्न उत्प्रेरित गर्न तथा बालविवाह न्यूनीकरणमा सचेतना जगाउन कार्यक्रमले सहयोग पुग्ने बालमैत्री फोकल पर्सन कुस्माखर पाण्डेयले बताए । ‘बालविवाहको दर घटाउन यस्ता कार्यक्रमले सहयोग पुगेको छ,’ उनले भने । बालमैत्री पालिका घोषणाको लागि अभियान सञ्चालनका लागि बालविवाह न्यूनीकरणसँगै महिलालाई शिक्षातर्फ प्रेरित गर्न प्रोत्साहन पुरस्कारले सहयोग पुग्ने विश्वास पालिकाको रहेको प्रवक्ता मेखबहादुर सुनारीले बताए ।