भैरहवा — अर्थमन्त्री स्वर्णिम वाग्लेले प्रस्तुत गरेको आगामी वर्षको बजेटलाई बुटवलका उद्योगी व्यवसायीले ‘राम्रो’ बजेट भन्दै स्वागत गरेका छन् । बजेटमा आर्थिक हबका रूपमा विकास भइरहेको रुपन्देही उपेक्षामा परे पनि उद्योगीहरूको हितमा रहेको प्रतिक्रिया व्यक्त गरेका छन् । बजेटका धेरै क्षेत्र कार्यान्वयन गर्न सके सकारात्मक रहेको प्रतिक्रिया उद्योगी व्यवसायीहरूको छ ।

बजेटले गौतम बुद्ध अन्तर्राष्ट्रिय विमानस्थलको सञ्चालनको जिम्मेवारी निजी क्षेत्रलाई दिने भनेको छ । बुटवल नजिकै निर्माणाधीन सिद्ध बाबा सुरुङ मार्ग भने आगामी आवभित्रै सञ्चालन गर्ने मात्र उल्लेख छ ।

पर्यटन क्षेत्रको विकासका लागि बृहत् लुम्बिनी विकास कार्यक्रमका लागि मात्र सरकारले ८३ करोड बजेट विनियोजन गरेको उल्लेख गरेको छ । त्यस्तै देवदह, रामग्राम, तिलौराकोट र कपिलवस्तु क्षेत्रको बृहत् पूर्वाधार विकास र तिलौराकोटलाई विश्व सम्पदा सूचीमा राख्ने पनि सरकारले उल्लेख गरेको छ ।

त्यस्तै बुटवलबाट पाल्पा हुँदै पोखरा पुग्ने सिद्धार्थ राजमार्गलाई अन्तर्राष्ट्रिय स्तरको बनाउने, काली गण्डकी चक्रपथ निर्माण गर्ने, प्रादेशिक अस्पताललाई विशिष्टीकृत अस्पतालमा विकास गर्ने विषयहरू यस क्षेत्रका लागि सकारात्मक रहेको व्यवसायीको प्रतिक्रिया छ ।

त्यस्तै कच्चा पदार्थमा भन्सार छुट, औद्योगिक ऐन संशोधन, औद्योगिक क्षेत्रभित्र व्यवसायीले निर्माण गरेका भवनलाई कर्जा प्रवाह गर्ने नीति, उधारो असुली ऐन बनाउने, भ्याटको डिजिटल भुक्तानीमा १० प्रतिशत फिर्ता, ३६० वस्तुमा अन्तःशुल्क खारेजजस्ता विषय उद्योग व्यवसायीका लागि उपलब्धिमूलक रहेको नेपाल औद्योगिक क्षेत्र उद्योग महासंघका अध्यक्ष एवं रुपन्देही उद्योग संघका पूर्वअध्यक्ष एजाज आलमले बताए ।

अघिल्ला वर्षहरूमा आउने गरेका कतिपय प्रावधान कार्यान्वयनमा जान नसके पनि अहिलेका विषय कार्यान्वयन हुने सम्भावना देखिएको उनको दाबी छ ।

‘२७३ प्रकारका कच्चा पदार्थको भन्सार दर घटाउने, ३६० वटा वस्तुमा लाग्ने अन्तःशुल्क खारेजी लगायतका विषयले उद्योगीलाई ठूलै राहत मिल्छ,’ उनले भने, ‘औद्योगिक ऐन संशोधन, औद्योगिक क्षेत्रभित्र व्यवसायीले निर्माण गरेका भवनलाई कर्जा प्रवाह गर्ने नीति, उधारो असुली ऐन बनाउने, भ्याटको डिजिटल भुक्तानीमा १० प्रतिशत फिर्ता लगायतका प्रावधान पनि अत्यन्तै सकारात्मक छन् ।’ कार्यान्वयन गर्न सके सरकारको आगामी वर्षको आर्थिक र औद्योगिक नीति देशको हितमा रहेको उनले बताए ।

सरकारले भन्सार दर ७ तहमा निर्धारण, ३१ निकाय खारेज, १८ निकाय पुनर्गठन लगायतका विषयलाई पनि व्यवसायीले सकारात्मक भनेका छन् । आर्थिक गतिविधि वृद्धि गर्ने केही क्षेत्रमा निजी क्षेत्रसँग सहकार्य गर्ने विषयमा पनि व्यवसायी उत्साहित बनेका छन् ।

नेपाल उद्योग वाणिज्य महासंघका केन्द्रीय सदस्य एवं बुटवल उद्योग वाणिज्य संघका अध्यक्ष हरिप्रसाद अर्यालले समग्रमा बजेट राम्रो भएको बताए । गौतम बुद्ध विमानस्थल, मोतीपुर औद्योगिक क्षेत्र सञ्चालनका लागि निजी क्षेत्रसँग सहकार्य गर्नु सकारात्मक भएको उनले बताए ।

‘मोतीपुर औद्योगिक क्षेत्र निर्माण र सञ्चालन, धौवादी फलाम खानी सञ्चालनका लागि निजी क्षेत्रसँग सहकार्य गर्ने विषय अत्यन्तै सकारात्मक रूपमा लिन सकिन्छ,’ उनले भने, ‘मोतीपुर क्षेत्रको विवाद सरकारले निरूपण गर्नुपर्छ ।’ तर, सार्वजनिक क्षेत्रमा गरिएको तलब वृद्धिले निजी क्षेत्रमा श्रमिकको समस्या बढ्न सक्ने, मूल्यवृद्धि नियन्त्रणबाहिर जान सक्ने लगायतका केही अप्ठ्यारा विषय भएकाले तिनको निरूपण सरकारले कसरी गर्छ भन्ने हेर्नुपर्ने उनले बताए । सञ्चालन खर्चको अनुपातमा सरकारले राजस्व असुली बढाउने विषय पनि चुनौतीपूर्ण रहेको उनको दाबी छ ।