सोमबार राति ८ बजेदेखि ९ बजेसम्म आएको तीव्र हावाहुरीले सयौं घरगोठ तथा संरचनामा क्षति पुर्याएको हो ।
गुल्मी — गुल्मीको मालिका गाउँपालिकाका अधिकांश वडामा हावाहुरीले वितण्डा मच्चाएको छ । सोमबार राति ८ बजेदेखि ९ बजेसम्म आएको तीव्र हावाहुरीले सयौं घरगोठ तथा संरचनामा क्षति पुर्याएको हो ।
हावाहुरीले नेटा, दर्लिङ र घमिरका धेरै ठाउँका संरचनामा क्षति पुगे पनि प्रहरीले घमिरको मात्रै हालसम्म तथ्यांक एकीकृत गरेको जनाएको छ । जिल्ला प्रहरी कार्यालय गुल्मीका प्रमुख प्रहरी उपरीक्षक भीमकिरण बोगटीका अनुसार, ४५ वटाभन्दा बढी संरचना घमिरमा मात्रै क्षतिग्रस्त छन् । अन्य क्षेत्रमा क्षतिको विवरण संकलन जारी रहेको उनले बताए ।
पानीसहितको हावाहुरीले घरगोठका छानो तथा शौचालयको छानो र विद्यालयमा समेत क्षति पुगेको थियो । अधिकांश संरचनाको छानो उडाएको छ । मुसिकोट नगरपालिका वडा नम्बर २ र ३ का पनि केही संरचनामा क्षति पुगेको छ । मदाने गाउँपालिका-१ मा पनि एक संरचनामा क्षति पुगेको हो । मालिकाका अन्य ठाउँमा पनि ठुलो परिणाममा क्षति पुगेको छ । प्रहरीले क्षतिको विवरण संकलन गरिरहेको छ ।
मालिका गाउँपालिकाका अध्यक्ष देवीराम अर्यालले १५० भन्दा बढी घरमा क्षति पुगेको विवरण आइसकेको र यो संख्या २०० भन्दा बढी हुने बताए । उनले प्रहरीले क्षतिको विवरण संकलन गरिरहेको बताए । अध्यक्ष अर्यालसहित मालिकामा मात्रै २०० भन्दा बढी संरचनामा क्षति पुगेको अनुमान छ ।
यस विषयमा मंगलबार सांसद गोविन्द पन्थीले संसद्को आकस्मिक समयमा बोल्दै मालिकामा हावाहुरीका कारण विस्थापित १५० घरपरिवारका ६०० जनाई तत्काल राहत प्रदान गर्न माग गरेका थिए । उनले अस्थायी बसोबाससहित पीडितलाई सरकार भएको महसुस गराउनुपर्ने माग राखेका हुन् ।
