पाल्पा — चैते धानमा गाँज हाल्ने बेला पातको छेउबाट खैरो लामो धर्सो आउने र टुप्पोबाट सुक्दै जाने समस्याले पाल्पाका किसान चिन्तित बनेका छन् । 

पूर्वखोला, रम्भा, निस्दी गाउँपालिकाका साथै रामपुर नगरपालिका क्षेत्रमा लगाएको चैते धानमा रोग फैलिएपछि किसान उत्पादन घट्ने त्रासमा छन् । पूर्वखोला गाउँपालिका–३ रिङ्नेरहमा करिब पाँच सय रोपनीभन्दा बढी क्षेत्रमा लगाइएको धान बालीमा रोग देखिएको किसानको गुनासो छ । 

पूर्वखोला किनारका खेतको धानमा गाँज हाल्ने बेला पातको छेउबाट खैरो लामो धर्सो आउने र माथि टुप्पोबाट सुक्दै गएर रातो देखिएको पूर्वखोला गाउँपालिका–३ रिङ्नेरहकी किसान थमीसरा पुनले बताइन् । उनले भनिन्, ‘मंसिरमा पाक्ने असारमा लगाएको धानमा यस्तो देखिए पनि यसपटक चैते धानमै यो सस्मया देखिँदा चिन्ता लागको छ ।’ 

पूर्वखोला आसपासका धानमा एक सातदेखि रोग फैलिन सुरु गरेको हो । फाट्टफुट्ट देखिएको रोग अहिले सबैतिर फैलिएको छ । सुरुमा हल्का रातो भएको र पछि बिस्तारै बोटभर फैलिएको पूर्वखोला–३ रिङ्नेरहकी सुकमाया बरालले बताइन् । ‘रोग पछिल्ला दिनमा धानका सबै बोटमा फैलिएको छ,’ उनले भनिन्, ‘प्राविधिकले पनि यस विषयमा जानकारी गराएका छैनन् ।’ 

स्थानीयले यसअघि मंसिरमा पाक्ने धानमा घरेलु औषधि उपचार गरेका थिए । जंगलमा पाइने खिलुवाको घाँसको झोल बनाएर राख्ने गरेको किसान बरालले बताइन् । खेतमा धान हेर्न आएका प्राविधिकले ब्याक्टेरिया लागेको भनेको उनले बताइन् । 

पूर्वखोला गाउँपालिकाको कृषि शाखाले प्रभावित क्षेत्रमा पुगेर नमुना संकलन गरी घरेलु उपचार गर्न सल्लाह दिएको छ । कृषि शाखा प्रमुख चाँदनी चौधरीका अनुसार गाईको गहुँतलाई एक/चार भागमा मिलाएर राख्न सल्लाह दिएको छ । कृषि प्राविधिक शिरबहादुर बुढाले किसानको खेतमा पुगेर रोगबारे अध्ययन गरेका हुन् । पालिकासँग औषधि नभएकाले किसानलाई सिफारिस गरेको उनले बताएका छन् ।