कपिलवस्तु — पूर्व–पश्चिम राजमार्गस्थित चन्द्रौटामा निर्माण गरिएको विशाल हनुमान मूर्तिको अनावरण गरिएको छ । बालापुर मोडमा निर्माण गरिएको उक्त मूर्तिको धार्मिक विधिपूर्वक प्राण प्रतिष्ठा गरेर लुम्बिनी प्रदेशका सहरी विकास तथा खानेपानी मन्त्री सरोज थापाले बुधबार अनावरण गरेका हुन् ।

शिवराज नगरपालिका–५ स्थित उक्त स्थानमा ३० फिट अग्लो हनुमान मूर्ति निर्माण गरिएको हो । मूर्तिको अधिकांश भाग फाइबर प्रयोग गरी तयार पारिएको छ । 

आव ०८१/८२ मा लुम्बिनी प्रदेश पर्यटन डिभिजन कार्यालय भैरहवाबाट १५ लाख रुपैयाँको लागतमा बेस निर्माण सम्पन्न गरिएको थियो । चालु आवमा भ्याटबाहेक ३५ लाख २३ हजार रुपैयाँ लागतमा देउराली निर्माण सेवाले मूर्ति निर्माण गरेको हो ।

मन्त्री थापाले सुन्दर सहर निर्माणसँगै चन्द्रौटालाई धार्मिक तथा पर्यटकीय हिसाबले महत्त्वपूर्ण गन्तव्य बनाउने उद्देश्यका साथ मूर्ति स्थापना गरिएको बताए । उनले धार्मिक पर्यटन प्रवर्द्धनले स्थानीय आर्थिक गतिविधिमा समेत टेवा पुग्ने बताए ।