रुकुम पूर्व — गत बिहीबार रोल्पाको जलजलामा भएको जिप दुर्घटनामा परी ज्यान गुमाउने जम्मा २० जना मध्ये रुकुम पूर्वमा ६ जनाको आज सामूहिक दाहसंस्कार गरिएको छ ।

सिस्ने गाउँपालिका–६ की मृतक युवा बुढाथोकीका श्रीमान् दीपक अमेरिकाबाट फर्किएपछि उनीसंगै ६ जनाको आज धाउने बगरस्थित सानीभेरी नदी किनारमा दाहसंस्कार गरिएको हो । 

दुर्घटनामा परेर युवा र उनका छोरासंगै उनकी सासुआमा तिलकुमारी बुढाथोकी, देवरगोर्ख बहादुर बीसी, कान्छी सासु ओमकुमारी बुढाथोकी, उनका छोरा सुदीप र बिहे भएर सल्यान गएकी छोरी सुजना बुढाथोकीको ज्यान गएको थियो । सृजनाको शव सल्यान लगिएपछि  बाँकी ६ वटा शव जिल्ला अस्पतालको शवगृहमा राखिएको थियो । 

हिजो राति युवाका श्रीमान् दीपक अमेरिकाबाट घर फर्किएपछि आज उनीहरुको अन्तेष्टी गरिएको हो । बाँकी १४ जनाको भने सम्बन्धित ठाँउमा लगेर गत शनिबार नै दाहसंस्कार गरिसकिएको छ ।