रामपुर नगरपालिकाले वडा कार्यालयबाटै सामाजिक सुरक्षा भत्ता वितरण गरेपछि दुर्गम वडाका ज्येष्ठ नागरिक, एकल, दलित, अशक्त र अपांगता भएकाहरू खुसी भएका छन् ।
What you should know
पाल्पा — पाल्पाको रामपुर नगरपालिका–९, अर्भसिङ मन्छेलुङका थानबहादुर पाटाले वडाबाटै सामाजिक सुरक्षा भत्ता पाएकामा खुसी छन् । उनलाई रामपुर पुगेर भत्ता लिनुपर्दा अतिरिक्त खर्च हुन्थ्यो । गाउँमै भत्ता बुझ्न पैदलै हिँडेर आएको उनले बताए ।
‘रामपुर जानुपर्दा एक हजारभन्दा बढी खर्च हुन्थ्यो,’ उनले भने, ‘भत्ताको पैसा वडा कार्यालयबाट वितरण हुँदा त्यो खर्च जोगिएको छ ।’ रामपुर नगरपालिका–९, जब्गादीकी भिमिसरा नेपाली पनि वडाबाटै सामाजिक सुरक्षा भत्ता बुझ्न पाएकामा रामपुर पुग्ने गाडीभाडा, नास्ता, खाना खर्च सबै जोगिएको बताइन् ।
आफ्नै सामाजिक सुरक्षा भत्ता लिनका लागि सवारी साधनमार्फत रामपुरको बेझाड बजार पुग्नुपर्ने उनले बताइन् । उनका अनुसार आउजाउ गर्दा हरेक पटक कम्तीमा हजार रुपैयाँ खर्च हुने गर्दथ्यो । ‘रामपुर जाँदा लाग्ने खर्च जोगिएको छ,’ उनले भनिन्, ‘मलाई धेरै ठूलो सहयोग भएजस्तो लागेको छ ।’
पाटा र नेपाली मात्र होइन, ज्येष्ठ नागरिकले सास्ती खेप्नु परे पनि अहिले वडा कार्यालयबाटै भत्ता बुझ्न पाउँदा सजिलो भएको बताएका छन् । ‘घरकै खाना खाएर घर नजिकैबाट भत्ता बुझ्न पाउँदा गाडी भाडा र खाजा खर्चसँगै समयको पनि बचत भएको छ,’ वडाबाटै सामाजिक सुरक्षा भत्ता बुझेकी नेपालीले भनिन् । 
रामपुर नगरपालिकाले वडा कार्यालयबाटै सामाजिक सुरक्षा भत्ता वितरण गरेपछि दुर्गम वडाका ज्येष्ठ नागरिक, ज्येष्ठ नागरिक एकल, ज्येष्ठ नागरिक दलित, असक्त, अपांगता भएकाहरू खुसी भएका हुन् ।
नगरपालिकाले बैंकमार्फत सामाजिक सुरक्षा भत्ता दिने व्यवस्था गरेको छ । तर कतिपय वडावासीका लागि बैंकको पहुँच भौगोलिक रुपमा टाढा छ । दुर्गम वडाका लाभग्राहीको सुविधाका लागि वडा कार्यालयबाट सामाजिक सुरक्षा भत्ता वितरण गर्दै आएको नगर प्रमुख रमणबहादुर थापाले बताए । पालिकाले नगरभित्र रहेका विभिन्न बैंकहरूसँगको सहकार्यमा प्रत्येक त्रैमासिक रुपमा भत्ता वितरण गर्दै आएको उनले बताए । रामपुर नगरपालिकाले वडा नम्बर १ र २ गाडाकोट, ९ को जब्गादी, १० को गेझाका नागरिकको सुविधाका लागि वडा कार्यालयबाटै सामाजिक सुरक्षा भत्ता वितरण गर्दै आएको उनले बताए ।
भत्ता वितरणसहित सामाजिक सुरक्षा भत्ता प्राप्त गर्ने लाभग्राहीका लागि राष्ट्रिय परिचयपत्रमार्फत बायोमेट्रिक भेरिफिकेसन सेवासमेत वडाबाटै दिइएको छ । वडा नम्बर ९ मा राखिएको शिविरमा १ सय ८२ जना लाभग्राहीलाई सामाजिक सुरक्षा भत्ता वितरण गरिएको थियो । साथै वडा कार्यालयमा भएको शिविरमा १ सय ४१ जनाको बायोमेट्रिक भेरिफिकेसन गरेको रामपुर नगरपालिकाका पञ्जीकरण शाखा प्रमुख प्रतिमा घिमिरेले बताइन् ।
शिविरमा १ सय ८ जना ज्येष्ठ नागरिक, ४ जना दलित ज्येष्ठ नागरिक, २० जना ज्येष्ठ नागरिक एकल, ६ जना एकल महिला र ३ जना अति अशक्त नागरिकको बायोमेट्रिक भेरिफिकेसन गरिएको वडासचिव चिन्तामणि भण्डारीले बताए ।
