भैरहवा — अन्तर्राष्ट्रिय स्वयंसेवी संस्था चुजी फाउन्डेसनले बुद्ध जन्मस्थल लुम्बिनीमा ‘चुजी लुम्बिनी क्याम्पस’ सञ्चालनको तयारी पूरा गरेको जनाएको छ । शिक्षा, स्वास्थ्य, सञ्चार र सामुदायिक सेवाको माध्यमबाट लुम्बिनीको समुदायस्तरमा जोडिन यो काम गरेको उसले जानकारी दिएको छ । 

गौतम बुद्धले प्रतिपादन गरेको दया, करुणा र मानवीय सेवामा आधारित रहेर विश्वका १ सय ३९ राष्ट्रमा आफ्नो संस्था कार्यरत रहेको र यसै सिलसिलामा लुम्बिनी पनि आफ्नो रोजाइमा परेको संस्थाको दाबी छ । 

चुजी फाउन्डेसनले शनिबार लुम्बिनीमा स्थानीय समुदायसँग अन्तर्क्रिया गर्दै चुजी लुम्बिनी क्याम्पस उद्यानको आउँदो वैशाख २० गते उद्घाटन गरिने जानकारी गराएको हो । क्याम्पस परिसरमा स्थानीय समुदायलाई विभिन्न सेवा प्रदान गर्न अस्पताल, सीप तालिम केन्द्र, सञ्चार र सामुदायिक भवन रहेका छन् । 

ताइवानमा मुख्यालय रहेको फाउन्डेसनकी उपाध्यक्ष लिनले दया, करुणा र मानवीय सहयोगका काममार्फत बुद्धभूमिमा नेपाली समुदायसँग सहकार्य गर्दै पारस्परिक सहयोगको भावनालाई पुस्तौंसम्मका लागि गहिरो रूपमा स्थापित गर्ने उद्देश्य रहेको बताइन् । 

चुजी फाउन्डेसनले २०७२ सालमा गएको भूकम्पमा घरवारविहीन १ हजार ८ सय परिवारलाई घर निर्माणसहित विदेशी चिकित्सक ल्याएर स्वास्थ्य उपचार प्रदान गरेको थियो । कोभिडको बेलामा १० वटा विमान चार्टर गरेर औषधिसहित स्वास्थ्य उपचार सामग्री उपलब्ध गराएको थियो । 

फाउन्डेसले सन् २०२२ देखि आफ्ना स्वयंसेवकहरूमार्फत लुम्बिनी, कपिलवस्तु र काठमाडौंलगायत क्षेत्रमा शिक्षा, स्वास्थ्य, विपन्न समुदायलाई सहयोग, सीप विकास तथा सामुदायिक सेवाका कार्यक्रम सञ्चालन गर्दै आएको छ । 

चुजी लुम्बिनी क्याम्पस उद्यानअन्तर्गत हाल लुम्बिनी बुद्धिष्ट चुजी स्कुलले किन्डरगार्टनदेखि २ कक्षासम्मको पहिलो शैक्षिक सत्र सुरु गरिसकेको र विद्यालयलाई १२ कक्षासम्म क्रमशः विस्तार गर्दै लैजाने योजना रहेको फाउन्डेसनका स्वयंसेवक राकेश त्रिपाठीले बताए । ‘दीर्घकालमा प्राविधिक शिक्षालय र विश्वविद्यालय स्थापना गर्ने लक्ष्य पनि राखिएको छ,’ उनले भने ।