अर्घाखाँची — भूमिकास्थान नगरपालिकाले मौरीपालन गरी मह उत्पादन गर्ने जिम्मा कृषक सहकारी संस्थालाई दिएको छ । वडा नम्बर १ र २ को ढाकावाङमा रहेको प्रगति कृषक सहकारी संस्थालाई ४७ थान मौरीसहितका घार र सामग्री उपलब्ध गराएको हो । 

नगरले वडा ९ को ढिकुरा, १० को धनचौर लगायत सम्भावित क्षेत्रलाई मौरी पकेट क्षेत्रको घोषणा गरी कृषकलाई मौरीपालन वृद्धि गर्न विभिन्न घार वितरणदेखि प्राविधिक सहयोग गर्दै आएको छ । 

ढाकावाङ पनि मौरीपालनको सम्भावित क्षेत्र भएकाले मौरी पकेट कार्यक्रमअन्तर्गत सहकारीलाई मौरी वितरण गरेको हो । पहिला रित्ता घार वितरण हुन्थे । 

त्यसो गर्दा घारमा मौरी नहुँदा खाली रहने र खेर गएकाले सहकारी समूहलाई मौरीसहित मौरीजन्य सामग्री वितरण गरिएको नगर उपप्रमुख बालकृष्ण बञ्जाडेले बताए । ४७ घार मौरी पाल्पाबाट ल्याइएको उनले बताए । मौरीपालनबाट घरखर्च चल्ने आम्दानी गर्न सक्ने भएकाले राम्रोसँग मौरी पाल्न बञ्जाडेले कृषकलाई सुझाव दिए ।

सहकारीमा आबद्ध भएका सबै कृषकको घरमा मौरीपालनलाई व्यवसायकै रूपमा अगाडि बढाउनुपर्ने बताए । नगरपालिकाले घरमै पुगेर कृषि प्राविधिकले सहयोग पुर्‍याउने उनले बताए । मौरी वितरण गरिएको ढाकावाङ मौरीपालन क्षेत्र भएकाले यहाँ पकेट क्षेत्रका रूपमा विस्तार गरी सबैका घरबाट मह उत्पादन गरेर स्थानीयलाई आत्मनिर्भर बनाउने नगरको लक्ष्य रहेको बञ्जाडेले बताए । 

५ लाख ८८ हजार ७ सय ३७ रुपैयाँ कुल लागत बजेटमध्ये २ लाख ९९ हजार ३ सय ६० रुपैयाँ नगरपालिकाको अनुदान रहेको छ भने अरु रकम सहकारीको लगानी रहेको सहकारीका अध्यक्ष भुवानन्द भुसालले बताए । यहाँ वन क्षेत्र धेरै रहेको र जंगलमा चिउरी, म्याल लगायत फूल फुल्ने रुख पर्याप्त भएकाले मौरीपालन फस्टाउने उनले बताए ।