भैरहवा — नेपाल र भारतमा पेट्रोलियम पदार्थको फरक मूल्य कायम हुँदा ढुवानी व्यवसायी मर्कामा परेका छन् । नेपालमा भन्दा भारतमा डिजेललगायत पेट्रोलियम पदार्थ सस्तो मूल्यमा बिक्री भइरहेको छ । यहाँ डिजेलको मूल्य उच्च रहेका बेला भारतीय मालवाहक गाडीले सस्तो इन्धन प्रयोग गरेर नेपालमा सामान ढुवानी गरिरहेका छन् । जसले मुलुकभित्रका ढुवानी व्यवसायी मर्कामा परेका हुन् । 

रुपन्देहीका ढुवानी व्यवसायीले सोमबार मध्याह्न प्रमुख जिल्ला अधिकारीलाई ज्ञापनपत्र बुझाउँदै समस्याबारे ध्यानाकर्षण गराएका छन् । ट्रक व्यवसायी पंकज राईको नेतृत्वमा प्रशासन पुगेका उनीहरूले भारतमा उपलब्ध सस्तो इन्धन प्रयोग गरेर नेपालका कुनाकाप्चासम्म भारतीय मालवाहक गाडीले ढुवानी गरिरहेको गुनासो पोखेका छन् । यसले नेपाली सवारी साधनलाई प्रतिस्पर्धात्मक रूपमा कमजोर बनाएकाले व्यवसाय सञ्चालन गर्न कठिनाइ भएको ज्ञापनपत्रमा उल्लेख गरेका छन् । 

‘भारतीय मालवाहकले मापदण्डविपरीत ओभरलोड बोक्ने गरेका छन्,’व्यवसायी राईले भने, ‘यस प्रकारको गतिविधिले बजारमा अस्वस्थ प्रतिस्पर्धा सिर्जना गर्नुका साथै सडक पूर्वाधारमा समेत असर गरिरहेको छ ।’ रुपन्देहीको बेलहियास्थित भन्सार नाकामा नेपाली तथा भारतीय मालवाहक गाडीको आवागमन तथ्यांक केलाएर आवश्यक कारबाही अगाडि बढाउन व्यवसायीले माग गरेका छन् । प्रतिकूल वातावरणका कारण ट्रक व्यवसायीहरू व्यवसाय सञ्चालन असमर्थ रहेको उनीहरूले उल्लेख गरेका छन् । ‘यस्तै अवस्था रहिरहे भविष्यमा व्यवसायबाट विस्थापित हुनुपर्ने छ,’ज्ञापनपत्रमा भनिएको छ, ‘तसर्थ नेपालमा डिजेलको मूल्य समायोजन गरियोस् ।’